Ihuriro rya politiki n’igisirikare Alliance Fleuve Congo (AFC/M23) ryamaganye byimazeyo ubwicanyi bukomeye bwakozwe n’umutwe w’iterabwoba wa ADF/Nalu kuri iki cyumweru tariki ya 27 Nyakanga 2025, bwahitanye abaturage 47, abandi bagafatwa bugwate, ubwo bari mu kiliziya Gatolika iherereye muri Teritwari ya Irimu, mu ntara ya Ituri, mu Burasirazuba bwa Repubulika Iharanira Demokarasi ya Congo (RDC).
Mu butumwa bwatambutse kuri X (yahoze ari Twitter), Lawrence Kanyuka, umuvugizi wa AFC/M23 mu bya politiki, yagize ati:
“AFC/M23 yamaganye ubwicanyi bwakorewe abaturage 47, bwakozwe na ADF/Nalu kuri iki cyumweru.”
Yongeyeho ko icyuho cy’umutekano n’ubushobozi bucye bw’ubutegetsi bwa Kinshasa mu kurinda ubuzima bw’abasivili, ari kimwe mu bituma AFC/M23 ikomeje gushyira imbere intego yo “kugarura ubutegetsi bushikamye” mu bice byose by’igihugu.
Mu rwego mpuzamahanga, Umuryango w’Abibumbye na wo wamaganye ibi bikorwa by’ubugome binyuranye n’amahame y’uburenganzira bwa muntu. Vivian Van de Perre, uhagarariye ingabo za MONUSCO by’agateganyo, yavuze mu itangazo rye:
“Ibi bitero byibasira abasivili batagira kivugira, by’umwihariko bikorerwa ahantu hatagatifu nk’insengero, ni igikorwa cy’ubugizi bwa nabi gihonyora uburenganzira bwa muntu ndetse n’amategeko mpuzamahanga arengera ikiremwamuntu.”
Yatangaje kandi ko MONUSCO ku bufatanye n’inzego z’umutekano za Leta ya Congo bagiye gukaza umutekano cyane cyane mu bice byibasiwe n’imitwe yitwaje intwaro, barengera ubuzima bw’abaturage n’ubusugire bw’ibikorwa remezo.
Ituri ni imwe mu ntara ziri mu kaga gakomeye k’ubushyamirane, aho imitwe yitwaje intwaro ikomeje kuyogoza ubuzima bw’abasivili, ibambura uburenganzira bwo kubaho mu mahoro no kwisanzura. ADF/Nalu, umutwe washinze imizi muri ako karere ukomoka muri Uganda, wagiye ushyirwa mu majwi kenshi n’inzego mpuzamahanga kubera ibikorwa by’iterabwoba n’ubwicanyi ndengakamere.
AFC/M23 ivuga ko iki gikorwa cy’iterabwoba kimaze kwerekana intege nke z’ubutegetsi bw’i Kinshasa mu gucunga umutekano, ikongera gusaba isesengura rihamye ku miyoborere y’igihugu. Iri huriro rivuga ko rifite umugambi wo kongera kwinjira mu bikorwa byo gushyiraho “ubutegetsi bushya” bwashobora kurinda abaturage, guteza imbere amahoro arambye no kurandura imitwe y’iterabwoba mu gihugu hose.
Ibikorwa nk’ibi bikomeje kwibutsa Isi yose ko RDC iri mu bihe bigoye bikwiye guhagurukirwa n’amahanga. Kwibasira ahantu hatagatifu n’abantu bari mu masengesho si icyaha gusa, ni ishyano ku burenganzira bwa muntu, kandi bisaba ko habaho ibikorwa bifatika, si amagambo gusa.
Ihuriro rya AFC/M23, kimwe n’Umuryango w’Abibumbye, barasaba ko haba iperereza ryimbitse ndetse n’ibihano bikomeye ku bagize uruhare muri ibi byaha, mu rwego rwo kurengera uburenganzira bw’abasivili no gukumira ikindi gisa nk’iki mu minsi iri imbere.