FARDC n’Abambari Bayo Bongeye Gutsindwa Bikomeye mu Ntambara yo mu Gace ka Kabare muri Kivu y’Epfo

Mu gihe umutuzo ugaragara nk’inzozi mu burasirazuba bwa Repubulika Iharanira Demokarasi ya Congo, inkundura y’imirwano yongeye gusuka amaraso mu misozi ya Kabare, aho ingabo za leta FARDC n’abafatanyabikorwa bazo barimo FDLR na Wazalendo bongeye gutsindwa bikomeye n’inyeshyamba za AFC/M23/MRDP. Imirwano yahuje impande zombi ku wa Kane tariki ya 07 Kanama 2025, ni indi sura y’amarira n’imiborogo ikomeje kubundabunda muri Kivu y’Epfo.

Amakuru yizewe yagejejwe ku kinyamakuru Minembwe Capital News dukesha iyi nkuru yemeza ko iyi mirwano yabereye hejuru y’agace ka Kavumu, hafi cyane y’ikibuga cy’indege cya Bukavu. Ni umwanya wa strategi mu ntambara irimo n’aho Leta yaherukaga kugaba ibitero bikomeye mu turere twa Walungu, Mikenke, Rugezi na Marunde.

Umutwe wa AFC/M23/MRDP, wasakiranye n’impuzamigambi za Leta maze urutsinda rukizwa n’amaguru. Ubuhamya butandukanye buturuka mu baturage batuye hafi y’ahabereye imirwano bugaragaza ko impande zombi zahanganye mu buryo bukomeye, ariko uruhande rwa Leta rugatakaza byinshi ku rugamba.

Iyi mirwano ibaye mu gihe hakomeje kumvikana amatangazo akomeye y’ihagarikwa ry’ibiganiro byari bitegerejwe hagati y’inyeshyamba za AFC/M23 na Leta ya Congo i Doha muri Qatar. Umutwe wa AFC/M23 watangaje ko utazasubira muri ibyo biganiro, utunga agatoki Leta ko yananiwe kubahiriza amasezerano y’ibanze, cyane cyane arebana no gufungura imfungwa zirenga 700 bafunzwe kuva intambara yatangira.

Mu mashusho yakwirakwijwe ku mbuga nkoranyambaga ku mugoroba wo ku wa Gatatu, bamwe mu barwanyi bagombaga kujya mu biganiro i Doha babonetse barimo kwinjira mu bwato berekeza i Bukavu, aho kwerekeza muri Qatar nk’uko byari byitezwe.

Perezida wa M23, Bertrand Bisimwa, yagaragaye mu majwi yumvikanye avuga ko “nta biganiro bizongera gukorwa n’ubutegetsi budashobora kubahiriza ibyo bwiyemeje imbere y’amahanga ndetse n’abaturage bayo.”

Ibi bisobanuye ko amahoro yongeye gukendera, kandi ibikorwa bya gisirikare bigiye kongera gufata indi ntera n’ingaruka ku baturage basanzwe ari bo baharenganira cyane.

Ibi bikorwa bya gisirikare bituma abaturage barushaho gusigara mu bwigunge, hagati y’impande zishyamiranye. Abaturage b’i Kavumu n’abahaturiye batangaza ko ubuzima bwabo buri mu kangaratete, bamwe bahungiye mu misozi no mu mashyamba, abandi barimo gushakisha ubuhungiro mu turere twa Bukavu na Minova.

Ese Doha Yari Igisubizo Cy’Igihe Kirekire cyangwa Umwotsi w’Umuriro?

Ubusesenguzi bw’abahanga mu bya politiki n’umutekano bwerekana ko ibiganiro by’i Doha byari nk’isoko y’icyizere ku baturage b’akarere, ariko kuba byasubitswe bishobora gutuma ibice bitandukanye by’imitwe yitwaje intwaro bifata icyemezo cyo kongera kwigarurira utundi duce.

Abo mu rwego mpuzamahanga basabye impande zombi kugaruka ku meza y’ibiganiro, ariko Leta ya Kinshasa ntiragira icyo itangaza ku byatangajwe na M23.

Mu gihe icyizere cy’ibiganiro gitangiye kuyoyoka, n’imirwano ikomeza gufata indi ntera, ikibazo gisigaye ni uko uburasirazuba bwa Congo bushobora kongera kuba isibaniro ry’imitwe yitwaje intwaro n’ingabo za Leta. Ibyemezo bifatwa uyu munsi ni byo bizagena ejo h’akarere karangwamo ibikorwa byinshi by’iyicarubozo, guhohotera abaturage no guhungabanya uburenganzira bwa muntu.