Ikipe ya Arsenal iri mu marembera yo kurangiza amasezerano yo kugura rutahizamu ukina hagati, Eberechi Eze, usanzwe akinira Crystal Palace, ku giciro cya miliyoni £55. Amakuru aturuka mu binyamakuru byo mu Bwongereza aravuga ko impande zombi zamaze kumvikana ku giciro cy’ibanze ndetse n’iby’inyongera, ariko hakiriho imbogamizi imwe ikomeye: Crystal Palace irifuza kubanza kubona umusimbura wizewe mbere yo kurekura uwo mukinnyi.
Umutoza Mikel Arteta amaze igihe yifuza kongera ubuhanga mu kibuga hagati no mu busatirizi bwa Arsenal, aho Eze, w’imyaka 27, afatwa nk’umukinnyi ushobora guhindura imiterere y’umukino mu buryo bwihuse. Uyu mukinnyi wigaragaje muri Crystal Palace, azwi cyane mu gutanga imipira y’ingenzi no gutsinda ibitego biva kure, ibintu byamuhesheje agaciro gakomeye mu makipe yo mu cyiciro cya mbere mu Bwongereza.
Nubwo ibiganiro by’amasezerano byageze kure, Palace irimo kwitondera isoko ry’igura n’igurisha ry’abakinnyi kugira ngo itazatakaza umukinnyi wayo w’ingenzi itarabona undi ushobora kuziba icyuho. Ibi bishobora gutuma isinywa ry’amasezerano ritinda, ariko ubuyobozi bwa Arsenal burizera ko ibintu bizarangira mbere y’uko isoko rifunga.
Ku mbuga nkoranyambaga, abafana ba Arsenal bakomeje kugaragaza ibyishimo, bavuga ko Eze azazana umuvuduko, ubuhanga mu gucenga, n’ubushobozi bwo gufungura imikino, bikaba bizafasha mu rugamba rwo guhatanira igikombe cya Premier League.
Iyo transfer nirangira, izaba iri mu zikomeye mu Bwongereza muri iyi mpeshyi, ikanongera icyizere cya Arsenal cyo guhagarara ku isonga mu gihe kiri imbere.