Minisitiri w’Ububanyi n’Amahanga Olivier Nduhungirehe yasubije Perezida Tshisekedi wavuze ko atigeze agaragaza imyitwarire y’intambara

Perezida wa Repubulika Iharanira Demokarasi ya Congo (RDC), Félix Antoine Tshisekedi Tshilombo, yavuze amagambo yagaragaye nk’agerageza gutanga intambwe y’ubwiyunge n’u Rwanda, ubwo yagezaga imbwirwaruhame ku bitabiriye inama mpuzamahanga ya kabiri ya Global Gateway Forum 2025, iri kubera i Buruseli mu Bubiligi.

Mu butumwa bwe, Tshisekedi yavuze ko atigeze agaragaza imyitwarire y’intambara, asaba Perezida Paul Kagame gukorana nawe mu guhagarika amakimbirane ari hagati y’ibihugu byombi.

Yagize ati:

> “Nta buryo na bumwe nigeze ngaragaza imyitwarire y’intambara. Twebwe twembi, ni twe twenyine dushobora guhagarika uku kwiyongera kw’umwuka mubi.”

Yakomeje agira ati:

> “imbere y’iyi nama n’imbere y’isi yose, nguhaye  ukuboko Nyakubahwa Perezida Kagame kugira ngo tugerageze amahoro y’abagabo.”

Perezida Tshisekedi yavuze ko kugira ngo amahoro aboneke, u Rwanda rugomba guhagarika gushyigikira umutwe wa M23, avuga ko uwo mutwe uterwa inkunga n’u Rwanda ukomeje guteza intambara n’urupfu mu Burasirazuba bwa Congo.

> “Icyo bisaba ni uko mutanga amabwiriza ku ngabo za M23 ziterwa inkunga n’igihugu cyanyu, kugira ngo zihagarike iyi ntambara imaze gutwara ubuzima bwa benshi,” yavuze Tshisekedi, asaba ko ibihugu byombi byakwirinda intambara bigaharanira amahoro n’iterambere.

Nduhungirehe yasubije Tshisekedi ati: “Ni wowe wenyine ushobora guhagarika iyi ntambara”

Nyuma y’aya magambo ya Tshisekedi, Ambasaderi Olivier Nduhungirehe, Minisitiri w’Ububanyi n’Amahanga w’u Rwanda, yamusubije abinyujije ku rubuga X (Twitter), avuga ko ari Tshisekedi ubwe wenyine ufite ubushobozi bwo guhagarika iyi ntambara.

Yanditse ati:

> “Oya, muribeshya rwose. Ni Perezida Tshisekedi wenyine ushobora guhagarika iyi ntambara, kandi ni we wenyine.”

Nduhungirehe yavuze ko Tshisekedi yakabaye atangira ahagarika imyitwarire ye y’intambara, irimo amagambo y’ubushotoranyi n’iterabwoba byo kwivugira ko azatera u Rwanda cyangwa akarasa Kigali. Yamusabye kandi kureka gusuzugura Perezida Kagame mu ruhame.

Yakomeje avuga ko Tshisekedi ashobora kugarura amahoro mu gihugu cye naramuka ahagaritse gushyigikira umutwe w’iterabwoba wa FDLR, awukura mu ngabo za RDC kandi akawirukana, nk’uko biteganywa n’Amasezerano y’Amahoro ya Washington.

> “Ashobora kubikora anahagaritse umutwe wa Wazalendo, yarawushinze, awuha intwaro n’amafaranga, ukaba ubu umaze kuba intangarugero mu mvugo z’urwango no mu guhiga abanye-Congo b’Abatutsi,” yavuze.

Minisitiri Nduhungirehe yanavuze ko Perezida Tshisekedi akwiye kureka gukoresha abarwanyi b’abanyamahanga n’indege za gisirikare mu kurasa abaturage bo mu Burasirazuba bwa Congo, cyane cyane mu bice by’abanyamulenge, kuko ibyo ari ukwica amasezerano mpuzamahanga igihugu cya RDC cyiyemeje kubahiriza.

> “Akwiye guhagarika n’ibitero by’indege ze n’ama-drones ku baturage b’inzirakarengane mu Burasirazuba bwa Congo, kuko ari ukwica amasezerano ya Washington n’ayibiganiro bya Doha,” yongeyeho.

Yasoje avuga ko ibyo Perezida Tshisekedi yakoze mu nama y’i Buruseli ari “comédie politique” aho yakoresheje urubuga rwagenewe ibiganiro ku bufatanye mu bukungu (Global Gateway Forum) kugira ngo avuge ibinyoma n’amagambo yo gushinja abandi, ariko mu by’ukuri ari we watangije amakimbirane ashaka kwitwaraho nk’aho ari intama yiciwe n’intare.

—

Mu magambo make, Nduhungirehe yibukije Tshisekedi ko amahoro atazagerwaho mu kuvuga gusa, ahubwo azagerwaho mu bikorwa — by’umwihariko niba RDC ihagaritse gufasha imitwe yitwaje intwaro, ikubahiriza amasezerano yasinywe kandi ikirinda politiki ishingiye ku gusebanya no gushinja abandi.