Uburasirazuba bwa Kongo: Amahoro ashobora kugaruka, ariko urwango rwimakajwe rushobora gusenya byose

“Nubwo Repubulika Iharanira Demokarasi ya Kongo (RDC) ikomeje inzira z’amahoro, ikibazo gikomeye gisigaye ni ukumenya niba igihugu kizashobora guhashya urwango n’amagambo y’irondabwoko byimakajwe mu buzima bwa politiki n’imibereho y’abaturage.” Corneille Ntaco 

Patriotisme cyangwa gukunda igihugu byasimbuwe n’urwango

Mu gihe cya politiki y’ubu muri Kongo, gukunda igihugu byasimbuwe n’imyumvire yo kwanga Abanyarwanda n’Abanye-Kongo bavuga Ikinyarwanda. Umuntu witwa “umuzalendo nyakuri” asobanurwa nk’uwanga, uharanira cyangwa uhutaza umuntu ugaragara nk’Umunyarwanda cyangwa uvuga nka we.

Ibi byatewe n’uko ubutegetsi bwa Kinshasa bwagiye bushushanya Abanye-Kongo b’Abatutsi nk’abanzi b’igihugu, bikaba byaramaze kuba politiki y’inyungu z’abantu bamwe. Urwo rwango rwakoreshejwe nk’intwaro yo kwiyamamaza no kwerekana ugukunda igihugu  mu maso y’abaturage, aho kwanga Abanyarwanda bifatwa nk’ikimenyetso cyo gukunda igihugu.

Umutekano w’igihugu ushyirwa mu rwego rw’irondabwoko

Imvugo ya politiki muri Kongo ijya igaragaza ko umutekano wa Leta ushingiye ku kwirukana cyangwa gucecekesha amoko amwe. Ibi byagize ingaruka zikomeye ku baturage bo mu moko y’abatutsi, cyane cyane Abanyamulenge n’Abahima, bakunze kwitiranywa n’abanyarwanda.

Aba baturage bagiye batukwa, bakicwa cyangwa bagatotezwa, bitwazwa ko “batari Abanye-Kongo” cyangwa ko ari “abanyunyuza imitsi y’igihugu.” Urwo rwango rwakomeje gukwirakwizwa binyuze mu bayobozi n’itangazamakuru.

Urwango rufite amateka akomeye kuva mu 1990

Kuva mu myaka ya 1990, amagambo y’urwango arwanya Abatutsi b’abanyekongo bitwa abanyarwanda, yabaye insanganyamatsiko ikomeye muri politiki y’imbere muri Kongo. Abanyapolitiki bakomeye barimo:

Abdoulaye Yerodia Ndombasi (1998) yavuze ko “Abatutsi ari udukoko tugomba kurandurwa neza.”

Justin Bitakwira (2023) yagize ati “Umututsi avukana icyaha, agomba kwicwa kugira ngo Kongo ibe iy’Abanye-Kongo nyabo.”

Martin Fayulu, umuyobozi w’ishyaka ritavuga rumwe n’ubutegetsi, yavuze ko “Abanyamulenge atari Abanye-Kongo kuko nta bwoko nk’ubwo bubaho muri Kongo.”

Constant Mutamba (2024) wahoze ari Minisitiri w’Ubutabera, yavuze ko “u Rwanda na Perezida Paul Kagame ari abanzi bakomeye ba Kongo.”

Na Perezida Félix Tshisekedi, mu kwiyamamaza, yavuze ko “abonye amahirwe yo guhindura itegeko nshinga, yakuraho ubutegetsi bwa Kigali.”

Itangazamakuru ryimakaje urwango

Aya magambo y’urwango yagiye yinjizwa mu bitangazamakuru n’abavuga rikijyana ku mbuga nkoranyambaga. Abanyamakuru n’abayobozi b’amatsinda y’abafana ba politiki bakwirakwiza ibitekerezo byuzuyemo amagambo asesereza Abatutsi, Abanyarwanda cyangwa Perezida Kagame.

Binyuze muri videwo, ibiganiro n’amashusho, ibi bisakara ku mbuga nka YouTube, TikTok na X (Twitter), bigakurura inyungu n’itumanaho rikomeye. Ariko iyo myitwarire ikomeza gutanya abaturage, igatuma ibiganiro by’amahoro bifatwa nk’ubugambanyi ku gihugu.

Amahoro ashobora kugaruka, ariko urwango rukagumaho

Nubwo intambara ishobora kurangira, urwango rwacengeye mu mitima y’abantu rushobora kugumaho. Ibyo bituma amahoro aba ay’igihe gito, kuko amagambo y’urwango ashobora kuzongera gutwika igihugu.

Leta ya Kinshasa ifite inshingano ikomeye yo guca imvugo z’urwango zimaze imyaka ikoreshwa nk’intwaro ya politiki. Niba koko ishaka kwiyubaka, igomba guhindura uburyo bw’imvugo n’imyumvire rusange y’abaturage.

Kongo ikeneye kuvugurura umuco w’imvugo rusange

Kugira ngo RDC igere ku mahoro arambye, ntibihagije gusinya amasezerano cyangwa gutsinda intambara. Ikeneye impinduka zifatika mu mitekerereze n’imvugo ya rubanda.

Gufata abateza urwango binyuze mu mvugo z’amacakubiri n’irondakoko nk’abanyabyaha, yaba ari abayobozi cyangwa abaturage basanzwe.

Gushyiraho amategeko n’ubugenzuzi mu itangazamakuru, hagamijwe kurwanya ibihuha n’urwango.

Kurema gahunda z’ubwiyunge, zihuza amoko yagiye ahangana, zigashyiraho ibiganiro by’ubworoherane n’ubwubahane.

Kugira ubuyobozi budaheza, buha ijambo abatuye igihugu bose, hatitawe ku bwoko cyangwa ururimi.

Guhagarika imbunda ntibihagije

Kongo ishobora gucecekesha amasasu, ariko niba idacecekesheje amagambo y’urwango, amahoro azaba ari ibigaragara gusa.

Nta mahoro arambye ashoboka mu gihugu cyimitse ivangura n’amagambo asenya. Niba RDC ishaka amahoro nyayo, igomba gucecekesha imbunda — ariko cyane cyane, igacecekesha amagambo y’urwango.