Mu karere ka Rulindo, umurenge wa Cyinzuzi, haravugwa urupfu rwa Kagina Ndagijimana, wapfuye mu buryo butaramenyekana nyuma y’iminsi ibiri aburiwe irengero.
Amakuru aturuka mu baturage avuga ko nyakwigendera yavuye mu rugo rwe ku wa Gatanu w’icyumweru gishize ajya mu isantere yo mu mudugudu wa Gatagara kunywerayo agacupa, aho bivugwa ko habayeho gushyamirana hagati y’abantu bari bahari muri iryo joro.
Umugore n’abana batatu yasize mu rugo ngo bategereje ko ataha, ariko baramubura, batangira kumushakisha bukeye bwaho. Umuturanyi wabo yagize ati:
> “Ku wa Gatandatu umugore we yansanze mu rugo ansaba kumubwira niba namubonye, mubwira ko ntamubonye. Bukeye twumvise ko umurambo wabonetse mu ishyamba rya Marembo. Twagiye kureba dusanga koko ni we.”
Umurambo wa Kagina wabonetse mu gihuru, mu ishyamba rya Marembo, aho bivugwa ko wasanzwe wubitse inda, utagaragaza ibimenyetso byo kunyagirwa, kandi imvura yari imaze iminsi ine igwa.
Bamwe mu bo mu muryango we bavuga ko yagiye afite telefoni ye ariko ntayo basanze afite, bityo bagasaba inzego z’umutekano gukora iperereza ryimbitse kugira ngo hamenyekane icyamwishe. Umwe muri bo yagize ati:
> “Turasaba ko ubutabera bukorwa, kuko biragoye kumva ukuntu umuntu aboneka yapfuye nta kimenyetso na kimwe cyerekana uko byagenze.”
Umuvugizi wa Polisi mu Ntara y’Amajyaruguru, IP Ignace Ngirabakunzi, yemeje aya makuru, avuga ko iperereza ry’ibanze ryatangiye.
Yagize ati:
> “Inzego zibishinzwe zahise zigera aho byabereye, zikora iperereza. Hari abantu bamaze gufatwa bakekwaho kugira uruhare mu gushyamirana kwabaye mbere y’urupfu rwe. Umurambo wajyanywe ku kigo cy’ubugenzacyaha kugira ngo hamenyekane icyateye urupfu. Turakangurira abaturage kwirinda ibikorwa bishobora gushyira abandi mu kaga.”
Abaturage bo muri ako gace bavuga ko urugomo rumaze kwiyongera, bagasaba inzego z’umutekano gukaza ingamba mu gukumira ibyaha bishobora guhungabanya ituze ry’abatuye Cyinzuzi.