Espanye: Ishuri ryigisha uburaya bw’umwuga rikomeje guteza impaka n’uruhurirane rw’ingaruka nshya ku babukora

Mu ntara ya Valence muri Espanye, hashinzwe ishuri ridasanzwe ryatangije amasomo y’uburaya bw’umwuga kuva muri Gicurasi 2024, ibintu byatunguye benshi ndetse bikaba bikomeje guca ibintu mu binyamakuru no mu nzego z’uburenganzira bwa muntu. Iki kigo cyafashe icyemezo cyo gushyira ku murongo amasomo y’icyumweru kimwe, aho uwiyandikishije yishyura amayero 100 ku nshuro imwe hanyuma agakurikira amasomo y’iminsi irindwi ahora anyura mu byiciro birimo ibyo mu ishuri n’iby’ubumenyi ngiro.

Amasomo atangwa arimo amateka y’uburaya mu bihugu bitandukanye, uburyo bw’imikorere buboneye bujyanye n’uwitwa umukozi w’uburaya w’umwuga, ubumenyi ngiro bwibanda ku mikoranire n’abakiliya, gusobanukirwa amategeko areba uwo mwuga n’ingaruka zawo, ikoreshwa ry’ibikoresho byifashishwa mu kazi ibizwi nka sex toys ndetse n’amasomo arebana n’imibonano mpuzabitsina agaruka ku bumenyi bwa Kamasutra. Abayobozi b’iki kigo bavuga ko intego yabo ari ugutuma abakora uwo mwuga babikora bafite ubumenyi, ukwiyubaja, n’ubushobozi bwo kwirinda ibibazo by’imitungo, iby’ubuzima n’iby’amategeko.

Urukiko rwa Valence rwatangaje ko aya masomo adafite icyo ahungabanya mu mategeko kuko areba abantu bakuru biyandikisha ku bushake bwabo kandi uburaya ubwabwo busanzwe bwemewe n’amategeko ya Espanye. Iki gihugu kiri mu bihugu bifite politiki yorohereza uburaya kimwe n’Ubudage, Ubuholandi, Danimarike, Nouvelle-Zélande, Ubusuwisi, Ububiligi, Ubugiriki, Ositaraliya n’ibindi byinshi. Ibi bituma Espanye iba kimwe mu bihugu bifite umubare munini w’ababukora ku mugaragaro, hagati y’ibihumbi 200 na 400, nk’uko imibare y’imiryango itegamiye kuri Leta ibigaragaza.

Nubwo ibi bihugu byemera uburaya mu buryo bw’amategeko, hari ibindi bihugu by’i Burayi bitabyemera mu mategeko ariko bikabwihanganira igihe butakoranywe ubuyobe cyangwa ngo bigaragare mu muhanda no mu ruhame. U Bufaransa ni kimwe muri ibyo, ariko ntibibuza ko indaya zihakorera mu buryo butaziguye, kandi ibarurishamibare rigaragaza ko zishobora kurenga ibihumbi byinshi.

Mu 2016, Umuryango w’Ubumwe bw’Uburayi watoye itegeko rihana abakiliya b’indaya mu rwego rwo guhashya icuruzwa ry’abantu no kurengera uburenganzira bw’abagore. Nyamara iri tegeko ryagize ingaruka zitandukanye kurusha uko byari biteganyijwe. Abakora uburaya batangaje ko iryo tegeko ryatumye babura abakiliya kandi rikanabateza gukorera mu bwihisho, bakajya gushakira abakiliya mu mashyamba, mu mihanda yo mu byaro, cyangwa ku mbuga nkoranyambaga. Bavuga ko bibashyira mu kaga k’ubukene burushijeho, kwiyongera kw’ibikorwa by’urugomo, imibonano idakingiye n’ibindi byago bya buri munsi.

Abarengera uburenganzira bw’igitsina-gore n’imiryango itegamiye kuri Leta bahamya ko iri tegeko ritakemuye ikibazo cy’icuruzwa ry’abantu ahubwo ryashyize ubuzima bw’abakora uwo mwuga mu bibazo byinshi kurusha mbere. Indaya n’abacungagahunda bazo bavuga ko kubona ishuri ritanga amasomo y’uburaya bw’umwuga ridakemura ikibazo cy’ubukene cyangwa ibibazo by’imiryango, ahubwo rishobora guha isura y’umwuga ikintu gikunze gufatwa nk’igisubizo cy’ubushobozi buke n’imibereho mibi.

Icyakora abayobozi b’iryo shuri bo bavuga ko gufasha abantu gukorana n’abo bahura babikora bafite ubumenyi, kwiyubaha n’amategeko abarinze ari yo nzira yo kugabanya ihohoterwa, kurwanya icuruzwa ry’abantu no kongera ubwisanzure bw’ababikora batabitegetswe. Gusa abasesenguzi bavuga ko iki kigo ari igihamya cy’uko ibibazo by’ubushomeri, ubukene n’icyuho cy’ubutabera ari byo bitera abantu kwinjira mu buraya aho gushaka umuti mu rwego rw’uburezi, inganda n’imibereho myiza.

Espanye irimo kwinjira mu nzira nshya yiganjemo ibisubizo bitavugwaho rumwe, bisaba isesengura rihamye rya politiki y’umurimo, uburenganzira bwa muntu n’uburyo imiryango ishobora kubaho idashyizwe ku gitutu cyo gushaka imibereho mu byuho bibangamiye icyubahiro cyabo. Ibi biteza impaka mu gihugu ndetse no mu Burayi muri rusange, mu gihe ijambo ku ijambo rigaragaza ko icyifuzo cy’impinduka gikwiye kujyana n’imiti irambye y’imibereho myiza, si ugushyiraho amashuri yemeza umwuga uvugwaho byinshi.