Diamond Platnumz mu rujijo: Iby’uko yahagarikiwe Visa mu bihugu by’iburayi na Amerika kubera gushyigikira Samia Suluhu byaba ari ukuri?

Diamond Platnumz mu Rujijo: Ibihuha ku guhagarikwa kwa Visa n’ingaruka z’imyigaragambyo y’amatora muri Tanzania

Mu minsi mike ishize, mu itangazamakuru ryo ku mbuga nkoranyambaga no mu matamatama y’amasura ya politiki y’akarere, hakomeje gukwirakwira amakuru avuga ko umuhanzi w’icyamamare wo muri Tanzania, Nasibu Abdul Juma uzwi cyane nka Diamond Platnumz, yaba yambuwe cyangwa yahagarikiwe visa zo kwinjira muri Amerika ya Ruguru n’ibihugu by’i Burayi. Ibyo bivugwa ngo byaturutse ku kuba yarashyigikiye Perezida Samia Suluhu Hassan mu matora aherutse kurangirita mu ruvange rw’imyigaragambyo, umutekano mucye n’amarangamutima y’ibice byombi by’igihugu.

Icyakora kugeza ubu, nta nzego zemewe n’amategeko, haba mu bihugu bivugwa cyangwa mu gihugu cye bwite, zirashyira umukono ku itangazo ryemeza ko Diamond yambuwe visa cyangwa ko ari ku rutonde rw’abantu bafatiwe ibihano bishingiye ku bikorwa bya politiki. Amakuru akomeje kuzenguruka aturuka mu nkuta za murandasi, mu bantu bavuga ko bafite “sources zabo bwite” byumwihariko aba blogger, ndetse no mu bitangazamakuru bito bidafite umuco wo gutangaza ibintu byagenzuwe neza mbere yo kubishyira ahagaragara. Ibi bisiga inkuru yose mu rujijo, ikaba ikiri mu rwego rw’icyiswe n’abanyamakuru b’inararibonye “amakuru ataremezwa n’igisobanuro cyemewe”.

Nyuma y’uko amatora yo mu Ukwakira 2025 arangiranye n’imyigaragambyo yibasiye ibice binini by’igihugu, Diamond Platnumz yasibye ku mbuga ze za Internet amafoto n’amashusho yose  yagaragazaga ko ashyigikiye Perezida Samia Suluhu Hassan n’ishyaka CCM. Ibyo byakurikiye ibyavugwaga ko abahanzi n’ibindi byamamare bari ku ruhande rwa leta byumwihariko abagaragaje ko ashyigikiye Samia Suluhu byakubiswe igufwa n’abaturage batishimiye uko amatora yagenze, bamwe bakajya ku mbuga zabo bakabikoraho ibitekerezo byabo bya politiki, abandi bagahura n’ingaruka zirimo gutakaza abayoboke ndetse no guhura n’ubugizi bwa nabi.

Muri ibyo bihe, abandi bahanzi barimo Harmonize, Rayvanny na Bill Nass na bo bagaragaye mu makimbirane n’abaturage babakurikirana, bamwe babaziza gushyigikira ubutegetsi, abandi babaziza kutavuga rumwe n’ibitekerezo by’abadashyigikiye ubutegetsi. Urugero rwasakaye cyane ni urwa Bill Nass, watwikiwe ibikorwa by’ubucuruzi n’abigaragambya barakajwe n’umwuka wa politiki utaravugwagaho rumwe n’impande zombi.

Nubwo ibi byose byahinduye isura y’imyidagaduro muri Tanzania, nk’uko bigaragara, nta kintu na kimwe cyemeza ko ku rwego mpuzamahanga hari icyakozwe mu rwego rwo guhana abahanzi kubera ibitekerezo bya politiki. Nta rwego na rumwe rurebana n’abinjira n’abasohoka muri Amerika, Canada, u Burayi cyangwa mu rwego rwa EU rwigeze rutangaza ko rwafatiye ibihano abantu runaka bo muri Tanzania, kandi yaba Diamond cyangwa abandi bahanzi ntibarashyira ahagaragara inyandiko cyangwa itangazo rigaragaza ko koko batagifite uburenganzira bwo kwinjira mu bihugu bimwe na bimwe.

Ikigaragara ari cyo cyonyine gifite gihamya ni uko amatora ya 2025 yateje umwuka uremereye mu gihugu, aherekejwe n’amakuru y’imyigaragambyo, guhagarikwa kwa Internet, gushyamirana hagati y’abashinzwe umutekano n’abaturage, ndetse n’abavuga ko amatora yakozwe mu buryo butari bwo. Uwo muvundo wose ni wo watumye buri gikorwa cy’umuhanzi cyangwa icyamamare kibona ibisobanuro bya politiki, abashyigikiye leta bagatangira kwitwa abanzi b’ubwisanzure n’amatora ya demokarasi, naho abatavuga rumwe na leta bakitwa abamamaza imvururu.

Ikibazo gikomeye kigomba kwibazwa ni iki: ese koko umuhanzi ashobora gufatwa ku rwego rwa politiki mpuzamahanga ku buryo visa ye yahagarikwa bitewe n’uwo yashyigikiye mu matora? Kugeza ubu, nta gisubizo cyemewe kuri icyo kibazo, kandi inkuru ikwiye gukomeza gukurikiranwa no kugenzurwa mu buryo bwimbitse, hatihutiwe kwemera cyangwa guhakana amakuru adafite aho ahuriye n’inyandiko zemewe.

Mu gihe hagitegerejwe ibimenyetso birambuye bishobora gusohorwa n’inzego zifite ububasha ku rwego mpuzamahanga, inkuru yose ikwiye gusuzumwa mu mucyo no kwitondera ibisakara ku mbuga nkoranyambaga. Icyo dukwiye kwemeza ni kimwe: ibihuha bibaho, ariko ntibihagije kugira ngo byitwe ukuri gutambutswa mu itangazamakuru ry’umwuga.