Umusore ukekwaho kwambura abamotari moto yarashwe arapfa agerageza gutoroka inzego z’umutekano i Kirehe

Mu gitondo cyo kuri uyu wa Gatatu tariki ya 7 Mutarama 2026, mu Mudugudu wa Kukabungo, Akagari ka Cyunuzi, Umurenge wa Gatore mu Karere ka Kirehe, mu Ntara y’Iburasirazuba,  habereye igikorwa cy’umutekano cyasize umusore witwa Eric apfuye, nyuma yo kuraswa n’inzego z’umutekano ubwo yageragezaga gutoroka.

Amakuru  agaragaza ko Eric yari asanzwe akekwaho ibikorwa by’ubujura n’ubugizi bwa nabi byibasiraga abamotari, aho yajyaga abatega akabambura moto zabo, rimwe na rimwe bikarangira bamwe muri bo bishwe. Uyu musore yari aherutse gufatirwa mu Karere ka Nyagatare, aho yari ari kugerageza kugurisha moto bivugwa ko yari yarambuye umumotari.

Bikekwa ko iyo moto yari iy’umumotari wishwe, umurambo we ukajugunywa mu gishanga gihingwamo umuceri mu ijoro ryo ku wa 1 Mutarama rishyira ku wa 2 Mutarama 2026. Icyo gikorwa cy’ubwicanyi cyari cyarakomerekeje abaturage n’abatwara moto mu bice bitandukanye by’Intara y’Iburasirazuba, cyane cyane mu karere ka Kirehe, aho abamotari bavugaga ko batewe ubwoba n’ibikorwa by’urugomo byiyongeraga.

Nyuma yo gufatwa, Eric yajyanywe n’inzego z’umutekano kugira ngo yerekane aho yari yarahishe ibikoresho yakoresheje yiba ndetse anica uwo mu motari. Icyo gikorwa cyari kigamije gukusanya ibimenyetso byafasha mu iperereza ryimbitse ku bikorwa bye, ndetse no gushakisha ibindi byari byaribwe.

Icyakora, ubwo yari agejejwe mu Mudugudu wa Kukabungo, aho bivugwa ko hari bimwe mu bikoresho yari yarahishe, yahise asimbuka imodoka yari atwawemo n’inzego z’umutekano agerageza guhunga. Ibyo byabaye muri iki igitondo, mu gace kiganjemo imirima n’ibishanga, bigatuma inzego z’umutekano zibona ko ari gushaka gucika zihita zikoresha imbunda.

Muri uko guhangana, Eric yarashwe ahita apfa. Umurambo we wahise uvanwa aho byabereye, mu gihe inzego z’umutekano zakomeje ibikorwa byo kugenzura ahabereye ibyabaye no gukusanya amakuru ajyanye n’icyo gikorwa.

Ibi byabaye byongeye gukangura impaka mu baturage ku kibazo cy’umutekano w’abamotari, cyane cyane mu bice by’icyaro aho bamwe bagaragaza ko bagenda bafite ubwoba bwo guterwa n’abagizi ba nabi babagirira nabi kugira ngo babambure moto. Abaturage bo mu Murenge wa Gatore bagaragaje ko bifuza ko umutekano wakomeza gukazwa, by’umwihariko ku masaha ya nijoro n’igihe cya kare cya mu gitondo, aho ibi byaha bikunze kubera.

Kugeza ubu, iperereza riracyakomeje kugira ngo hamenyekane niba Eric yakoraga wenyine cyangwa niba yarakoreraga mu itsinda ry’abagizi ba nabi, ndetse no gusuzuma niba hari abandi bantu bagize uruhare muri ibi bikorwa by’ubujura n’ubwicanyi byibasiye abamotari. Inzego z’umutekano zatangaje ko zizakomeza gukurikirana ikibazo cyose kijyanye n’iki cyaha, hagamijwe kurinda umutekano w’abaturage n’ibyabo.

Iyi nkuru ikomeje gukurikiranwa, mu gihe abaturage basabwa gukomeza gutanga amakuru ku gihe kugira ngo hafatwe ingamba zo gukumira ibyaha nk’ibi no gusigasira ituze n’umutekano mu bice byibasiwe n’ibikorwa by’urugomo.