Leta Zunze Ubumwe za Amerika zashyizeho ingwate igera ku $15,000 ku baturage b’ibihugu 23 bya Afurika basaba visa

Leta Zunze Ubumwe za Amerika zatangiye gushyira mu bikorwa amategeko mashya akakaye agenga itangwa rya visa, areba by’umwihariko abaturage b’ibihugu 23 byo ku mugabane wa Afurika, aho abifuza kujya muri Amerika basabwa gutanga ingwate ishobora kugera ku madolari 15,000 mbere yo guhabwa visa.

Ibihugu byashyizwe kuri uru rutonde birimo Algeria, Angola, Benin, Botswana, Cape Verde, Côte d’Ivoire, Djibouti, Gabon, Gambia, Guinea, Guinea-Bissau, Repubulika ya Santarafurika (CAR), Malawi, Mauritania, Namibia, Nigeria, São Tomé and Príncipe, Senegal, Tanzania, Togo, Uganda, Zambia na Zimbabwe.

Izi ngamba zashyizweho hashingiwe ku mategeko agenga abinjira n’abasohoka muri Amerika azwi nka Immigration and Nationality Act (INA), aha ububasha Perezida wa Amerika n’inzego zishinzwe abinjira n’abasohoka (Department of Homeland Security na State Department) bwo gushyiraho ibisabwa byihariye ku baturage b’ibihugu bifatwa nk’aho hari ibyago byo kutubahiriza amategeko ya visa.

Ingwate isabwa igamije kwemeza ko ugiye muri Amerika azubahiriza ibyo yemerewe kuri visa, birimo kutarenza igihe yemerewe kugumayo no kudakora ibikorwa binyuranyije n’ubwoko bwa visa yahawe.

Abasesenguzi mu by’amategeko y’abinjira bavuga ko izi ngamba zishingiye ku mibare ya Leta ya Amerika igaragaza ko hari umubare munini w’abasaba visa baturuka mu bihugu bimwe bya Afurika baguma muri Amerika nyuma yo kurangiza igihe bari bemerewe, bigatuma Leta ishaka kongera uburyo bwo kubikumira.

Mu rwego rw’amategeko mpuzamahanga, izi ngamba zishingira ku ihame rya “state sovereignty over borders”, risobanura ko buri gihugu gifite uburenganzira busesuye bwo kugena uwinjira ku butaka bwacyo n’ibisabwa agomba kuba yujuje. Iri hame ryemewe n’amategeko mpuzamahanga, cyane cyane igihe ingamba zifatwa zigamije umutekano, igenzura ry’abinjira n’iyubahirizwa ry’amategeko.

Nubwo hari ababona izi ngamba nk’izigoye kandi ziremereye abaturage b’ibihugu bikennye, Leta ya Amerika ivuga ko zitagamije guheza cyangwa kuvangura, ahubwo zigamije gushyiraho uburyo bukomeye bwo kugenzura iyubahirizwa rya visa, cyane cyane ku ngendo z’igihe gito zirimo iz’ubukerarugendo, ubucuruzi n’izo gusura imiryango.

Abaturage bo mu bihugu byashyizwe kuri uru rutonde basabwa kwitwararika neza ibisabwa bishya, bakabanza kugisha inama Ambasade za Amerika mu bihugu byabo mbere yo gusaba visa, kugira ngo basobanukirwe neza ingano y’ingwate bashobora gusabwa n’ibisabwa bijyanye n’ubwoko bwa visa bifuza.

Izi ngamba zije ziyongera ku zindi Amerika yari isanzwe ifite mu rwego rwo gukaza igenzura ku bimukira, mu gihe iki gihugu gikomeje guhangana n’ikibazo cy’abimukira binjira cyangwa baguma ku butaka bwacyo mu buryo bunyuranyije n’amategeko.