Amakipe abiri akomeye muri championa y’u Rwanda yanenze FERWAFA yazishyize ku ruhande mu gikombe cy’intwari
Amakipe ya Mukura Victory Sports na Kiyovu Sports agaragaza kutishimira icyemezo cy’ishyirahamwe ry’umupira w’amaguru mu Rwanda, FERWAFA, cyo kuyakura mu makipe azitabira Igikombe cy’Intwari cy’uyu mwaka w’imikino wa 2025–2026.
Ku wa mbere tariki 12 Mutarama 2026, ni bwo FERWAFA yasohoye ibaruwa imenyesha amakipe ko Igikombe cy’Intwari cy’uyu mwaka kizitabirwa n’amakipe ane ya mbere mu bagabo n’abiri mu bagore yitwaye neza mu mwaka w’imikino wa 2024–2025. Mu bagabo ayo makipe ni Rayon Sports, APR FC, Police FC na AS Kigali, mu gihe mu bagore harimo Rayon Sports WFC na Indahangarwa WFC.
Nyuma yo gusohora iri tangazo, FERWAFA yasobanuye ko yahisemo gushingira ku manota y’umwaka ushize w’imikino bitewe n’uko imikino ibanza ya Shampiyona y’uyu mwaka itari yarangira, bityo bikaba byari bigoye kumenya amakipe ayoboye ku rwego rw’igihugu.
Icyakora, iki cyemezo cyateje impaka mu makipe atari make, by’umwihariko Kiyovu Sports na Mukura Victory Sports, zombi zari mu makipe ane ya mbere nyuma y’imikino ibanza ya Shampiyona y’uyu mwaka w’imikino.
Amakuru INGANZO HUB yamenye aturutse kuri umwe mu bayobozi ba Kiyovu Sports avuga ko iyi kipe yandikiye FERWAFA isaba ibisobanuro birambuye, kuko yabonaga ifite uburenganzira bwo gukina iri rushanwa hashingiwe ku myanya yarimo muri Shampiyona y’uyu mwaka.
Ku rundi ruhande, amakuru dukesha IGIHE agaragaza ko ku wa Gatanu tariki 16 Mutarama 2026, Mukura Victory Sports na yo yandikiye FERWAFA isaba gusobanurirwa impamvu itisanze mu makipe azakina Igikombe cy’Intwari, mu gihe yari mu makipe ane ya mbere asoje imikino ibanza ya Shampiyona.
Ubusanzwe, Igikombe cy’Intwari gikinwa n’amakipe aba ayoboye Shampiyona nyuma y’imikino ibanza y’umwaka w’imikino uriho. Hashingiwe kuri ayo mahame, amakipe yagombaga kwitabira iri rushanwa mu bagabo yari APR FC, Police FC, Kiyovu Sports na Mukura Victory Sports, mu gihe mu bagore hari Rayon Sports WFC na Police WFC.
Igikombe cy’Intwari cy’uyu mwaka biteganyijwe ko kizatangira tariki 28 Mutarama kigasoza tariki 1 Gashyantare 2026, umunsi nyirizina u Rwanda rwizihiza Umunsi Mukuru w’Intwari z’Igihugu.