Umugaba Mukuru w’Ingabo za Repubulika Iharanira Demokarasi ya Kongo (FARDC) yoherereje abakuru b’ingabo bose telegram ya gisirikare yihutirwa abasaba gutoranya no kohereza byihuse abasirikare bazashyirwa mu mutwe udasanzwe uzahabwa amahugurwa yihariye ku bufatanye n’ingabo za Leta Zunze Ubumwe za Amerika.
Iyo telegram igaragaza ko uwo mutwe uzatoranywa uzitabira amahugurwa azibanda ku myitozo ya gisirikare ihanitse, irimo kuyobora ingabo (command), imyitozo y’ibanze y’abasirikare (infantry), intambara y’ikoranabuhanga n’iy’uruhurirane (cybercriminalité na guerre hybride), ndetse n’amahugurwa ajyanye n’amategeko n’imiyoborere y’ingabo.
Amakuru akubiye muri iyo nyandiko agaragaza ko ayo mahugurwa azabera ahatandukanye mu bihe bitandukanye by’umwaka wa 2026, aho bamwe mu basirikare bazitabira amahugurwa azategurwa ku bufatanye n’ibigo by’amahugurwa bya gisirikare bya Amerika, birimo n’ibikorwa bivugwa ko bizabera ku butaka bwa Kongo.
Uwo mutwe udasanzwe uteganyijwe gushyirwaho mu gihe FARDC ikomeje guhangana n’imitwe yitwaje intwaro mu Burasirazuba bwa Kongo, aho Leta ivuga ko intego ari “kwisubiza buri sentimetero y’ubutaka bwa Kongo ifitwe na M23 no kurinda ubusugire bw’igihugu n’umutekano w’abaturage.”
Ibi bibaye mu gihe kandi amakuru aturuka mu Burundi avuga ko ingabo za Amerika zatangiye ibikorwa by’amahugurwa yihariye ku ngabo z’u Burundi (FNDB), mu rwego rwo kongerera ubushobozi igisirikare cy’icyo gihugu. Abasesenguzi bamwe babona ibi nk’ikimenyetso cy’uko Amerika iri kongera ubufatanye mu bya gisirikare n’ibihugu byo mu Karere k’Ibiyaga Bigari.
Nubwo nta tangazo riratangazwa n’ubuyobozi bwa Amerika risobanura byimbitse intego z’aya mahugurwa, hari impungenge n’ibibazo bikomeje kwibazwa ku rwego rw’akarere: Ese ni gahunda isanzwe yo gufasha ingabo z’akarere kongera ubushobozi bwo guhangana n’imitwe yitwaje intwaro, cyangwa ni igice cy’igenamigambi rinini rijyanye n’umutekano n’inyungu za geopolitiki mu Karere?
Mu gihe ubuyobozi bwa Kongo bwo bushimangira ko ubu bufatanye bugamije gusa kubaka igisirikare gikomeye kandi gishoboye kurinda igihugu, haracyategerejwe ibisobanuro birambuye ku ishusho rusange y’uruhare rw’ingabo za Amerika mu Karere n’ingaruka z’igihe kirekire kuri politiki n’umutekano w’ibihugu birebwa.
