Uko urubanza rwagenze:DJ Toxxyk yajuriye asaba gufungurwa by’agateganyo, Ubushinjacyaha bumushinja kugonga yanyoye inzoga no guhunga ubutabera

Kuri uyu wa 4 Gashyantare 2026, DJ Toxxyk uzwi ku izina rya Shema Arnaud yitabye Urukiko Rwisumbuye rwa Nyarugenge ajurira ku cyemezo cy’Urukiko rw’Ibanze rwa Nyarugenge cyamufunze iminsi 30 by’agateganyo, asaba kurekurwa by’agateganyo mu gihe ategereje kuburanishwa mu mizi.

Uyu muvanga miziki akurikiranyweho ibyaha birimo kugonga umuntu bikamuviramo urupfu, gukoresha ibiyobyabwenge no gutwara ikinyabiziga yanyoye inzoga, avuga ko ifungwa rye ridakwiye bitewe n’inshingano z’umuryango n’ubucuruzi afite. Yabwiye urukiko ko afite umwana muto akeneye kwitaho, ko ababyeyi be barwariye mu Bubiligi, ndetse ko ibikorwa bye by’ubucuruzi biri kwangirika kubera ifungwa.

Abamwunganira bashimangiye ko impanuka yaguyemo umupolisi itari yagambiriwe, ko ari ubwa mbere umukiliya wabo agize uruhare mu gikorwa nk’icyo, ndetse banavuga ko umuryango w’uwagonzwe wamuhaye imbabazi. Bavuze ko ibi bigaragaza ko hakwiye gukoreshwa ihame ryo kumuha amahirwe yo gufungurwa by’agateganyo.

Ku birego bijyanye n’ibiyobyabwenge, abamwunganira bavuze ko isaka ryakozwe ridakurikije amategeko, ko yabajijwe atarahabwa umunyamategeko, kandi ko nta bipimo bya laboratwari byemeza ko yakoresheje urumogi cyangwa inzoga. Bityo, basabye urukiko gutesha agaciro ibyo bimenyetso.

Icyakora, Ubugenzacyaha n’Ubushinjacyaha byavuze ko hari ibimenyetso bifatika bigaragaza ko DJ Toxxyk yagonze umupolisi yanyoye inzoga, ndetse agahunga aho icyaha cyabereye ajya mu Karere ka Karongi. Ku ruhande rw’ubushinjacyaha, iki gikorwa cyo guhunga cyafashwe nk’ikimenyetso simusiga cy’uko atari “igihunga”, ahubwo yashakaga kwihisha ubutabera.

Ubushinjacyaha bwongeyeho ko kuba avuga ko yemera icyaha agasaba imbabazi bidakuraho uburemere bw’ibyo akurikiranyweho, cyane cyane ko mu nyandiko zo mu rukiko atigeze yemera ku mugaragaro ibyaha byose, by’umwihariko ibijyanye n’ubusinzi n’ibiyobyabwenge, ahubwo akabihakana.

Nyuma yo kumva impande zombi, Urukiko Rwisumbuye rwa Nyarugenge rwatangaje ko ruzasoma umwanzuro ku bujurire bwe ku ifungwa n’ifungurwa by’agateganyo ku wa 9 Gashyantare 2026 saa cyenda z’amanywa.

Iki kibazo gikomeje kwibazwaho cyane mu baturage, aho bamwe bibaza ukuntu ukekwaho icyaha cyahitanye ubuzima bw’umuntu ashobora gusaba gufungurwa by’agateganyo yitwaje impamvu z’umuryango n’ubucuruzi, mu gihe Ubushinjacyaha bumushinja ko yemeye icyaha ku rwego rumwe ariko akagihakana ku rundi, bigatera urujijo ku nyito nyayo y’ubujurire bwe.