Ruto Yategetse Polisi Gukoresha Imbaraga ku Bigaragambya: “mubarase amaguru, ariko ntimubice!”

📍 Nairobi, Kenya – Perezida wa Kenya, William Samoei Ruto, yongeye kuvugisha benshi nyuma yo gutangaza amagambo akomeye agenewe inzego z’umutekano, aho yategetse ko abigaragambya bagamije kwangiza ibikorwa by’abacuruzi baraswa amaguru, aho kubica, bagasigara bafite igikomere kibibutsa ibyo bakoze.

Mu ijambo rye ryatambutse kuri televiziyo y’igihugu kuri uyu wa Kabiri, Ruto yagize ati:

> “Iyo umuntu agambirira kwinjira mu iduka ry’umucuruzi akajya kwiba cyangwa kwangiza, ntabwo ari ukwigaragambya. Ni ubugizi bwa nabi. Polisi ifite uburenganzira bwo kumurasa mu kuguru, ntimumwice, ahubwo amenyeko igihugu gifite amategeko.”

Aya magambo aje mu gihe Kenya imaze iminsi ihanganye n’imyigaragambyo y’abaturage batishimiye gahunda z’ubukungu za leta, zirimo kongera imisoro no kugabanya ingengo y’imari mu nzego zimwe na zimwe z’ubuzima rusange.

Iyi myigaragambyo yateje umutekano muke mu mijyi itandukanye ya Kenya, harimo Nairobi, Kisumu na Mombasa, aho bamwe mu bigaragambya bagaragaye bashyira umuriro mu modoka, binjira mu mazu y’ubucuruzi, ndetse bagatera polisi amabuye.

Polisi ya Kenya yagaragaye ikoresha imyuka iryana mu maso, amazi y’umunyu ndetse no kurasa amasasu mu kirere mu rwego rwo gutatanya abigaragambya. Abahanga mu by’amategeko n’uburenganzira bwa muntu batangiye gusaba Ruto kwisubiraho, bavuga ko gutegeka kurasa abantu, kabone n’ubwo bitabica, bishobora gutuma hiyongeramo ihohoterwa rishingiye ku mategeko.

⚖️ Imiryango Iharanira Uburenganzira bwa Muntu Iraburira Leta

Umuryango wa Human Rights Watch watangaje ko amagambo ya Perezida Ruto “ashobora gushishikariza imikoreshereze y’ubugome n’ihohoterwa ry’abaturage” kandi ko kuri polisi, kurasa amaguru atari uburyo bwo gukemura ibibazo by’imyigaragambyo, ahubwo ari uguteza urundi ruhuri rw’amakimbirane.

Ruto: “Ndi ku ruhande rw’abashoramari”

Perezida Ruto yakomeje agaragaza ko azahagarara ku ruhande rw’abashoramari n’abacuruzi, aho yavuze ko igihugu kigomba kugira ituze n’umutekano kugira ngo “ubukungu bukomeze gutera imbere, si ukwihanganira abashaka kubusenya”.

> “Dufite uburenganzira bwo kugaragaza ibitekerezo, ariko si ukwica igihugu. Abanyapolitiki n’abandi bafite izindi nyungu bagomba guharanira ko imyigaragambyo iba mu buryo bwemewe n’amategeko, atari ugutesha agaciro abandi baturage.”