Migori, Kenya – Mu gikorwa cyakoze ku mitima ya benshi, umukecuru w’imyaka 70 utuye mu gace ka Migori muri Kenya yagaragaje urukundo rudasanzwe afitiye umwuzukuru we, ubwo yajyaga ku ishuri amuzaniye imboga mu rwego rwo gusaba ko atakomeza kwirukanwa kubera kutishyura amafaranga y’ishuri.
Uyu mukecuru, ufite ubumuga bwo kutabona neza (abona gahoro), yakoze urugendo rurerure yikoreye agatebo karimo imboga, maze agera ku ishuri asaba ubuyobozi ko bwakwakira izo mboga nk’inkunga y’amafaranga umwuzukuru we asabwa. Yavuze ko adafite ubushobozi bwo kwishyura amafaranga, ariko ko yifuza ko umwuzukuru we ugaragaza ubuhanga mu masomo, akomeza kwiga.
> “Simfite amafaranga, ariko mfite imboga. Nibura mwemere izi mboga umwana akomeze kwiga,” ni amagambo yasize yasigiye benshi amarira ku matama, nk’uko bivugwa n’umwe mu barimu wari uhari.
Ubuyobozi bw’ishuri bwavuze ko ubwo bushake bw’uyu mukecuru ari isomo rikomeye ryo kwitanga n’urukundo, ndetse ko bugiye kugerageza kumushakira ubufasha bufatika. Umuyobozi w’ishuri yagize ati:
> “Twabonye urugero rudasanzwe rwo kwitanga. Tugiye kuganira n’inzego zitandukanye kugira ngo uyu mwana afashwe, kuko afite ubushobozi mu myigire.”
Abaturage bo muri ako gace ndetse n’abakoresha imbuga nkoranyambaga batangajwe n’iki gikorwa, benshi basaba ko uwo mwana yafashwa kwiga nta nkomyi, ndetse bamwe batangiye kwishyira hamwe mu bikorwa byo gukusanya inkunga.
Inkuru y’uyu mukecuru ikomeje gukwirakwira, igaragaza ishusho nyayo y’ubwitange bw’ababyeyi n’abakurambere, ndetse inakangurira sosiyete gufasha abana bose kubona uburenganzira ku burezi, kabone n’iyo ibikoresho byaba ari bike.