Perezida Kagame yakiriye abayobozi b’ikigo mpuzamahanga Rio Tinto, baganira ku mushinga w’ubucukuzi mu Rwanda

Kigali – Ku wa Gatanu tariki ya 18 Nyakanga 2025, Perezida wa Repubulika y’u Rwanda Paul Kagame yakiriye mu biro bye i Village Urugwiro itsinda ry’abayobozi b’ikigo mpuzamahanga gikora ubucukuzi bw’amabuye y’agaciro Rio Tinto, riyobowe na Mark Davies, Umuyobozi Mukuru ushinzwe ibya tekinike muri icyo kigo.

Nk’uko ibiro by’Umukuru w’Igihugu byabitangaje, ibiganiro byabo byibanze ku kureba uko imishinga iriho hagati ya Rio Tinto n’u Rwanda ihagaze, ndetse n’amahirwe mashya yo gukomeza gukorana muri urwo rwego.

Rio Tinto, kimwe mu bigo binini ku isi mu bijyanye n’ubucukuzi bw’amabuye y’agaciro, imaze igihe ikorera ubushakashatsi n’ishoramari mu Rwanda, cyane cyane mu byerekeye amabuye y’ingenzi akoreshwa mu nganda z’ikoranabuhanga. U Rwanda rwamaze kwiyemeza guteza imbere urwego rw’ubucukuzi mu buryo burambye, rujyanye n’amahame yo kurengera ibidukikije no kurinda inyungu z’abaturage.

Mu butumwa bukubiyemo amafoto bwashyizwe ku mbuga nkoranyambaga za Perezidansi y’u Rwanda, hagaragara Perezida Kagame ari kumwe na Mark Davies hamwe n’abandi bayobozi ba Rio Tinto, baganira mu buryo bwisanzuye.

Perezidansi y’u Rwanda yatangaje iti:

> “Perezida Kagame yakiriye Mark Davies n’itsinda rya Rio Tinto. Bagiranye ibiganiro ku iterambere ry’ubufatanye mu bucuruzi n’ubucukuzi bw’amabuye y’agaciro hagati ya Rio Tinto n’u Rwanda.”

Uyu mubano hagati ya Leta y’u Rwanda n’abashoramari b’ingenzi ku rwego mpuzamahanga, ugaragaza uburyo u Rwanda rukomeje kwiyubaka nk’ihuriro ry’ishoramari ryizewe muri Afurika, rufite politiki ishyigikira ibikorwa birambye kandi bifitiye abaturage akamaro.