Ikipe ya Rayonsport yongeye guha ikaze abanyabigwi bayo Amissi Cedric na Rutanga Eric ndetse banakoranye imyitozo y’uyu munsi

Nzove – Umwuka w’ibyishimo n’ubwuzu wongeye gutaha mu mbuga ya Rayon Sports ubwo abakinnyi babaye ibyamamare muri iyi kipe, Cedric Amissi na Eric Rutanga, basubiraga mu myitozo hamwe n’ikipe y’uyu munsi.

Nk’uko ubuyobozi bwa Rayon Sports bwabitangaje ku umugoroba wo kuri uyu wa Gatanu, aba basore bombi bari mu myitozo y’ikipe, ibintu byakiriwe nk’ubutumwa bwuzuyemo amateka, ishema n’urukundo.

Amissi, wari mu ikipe kuva mu 2011 kugeza 2014, yanditse amateka mu mwaka w’imikino wa 2012–2013 ubwo yafashaga Rayon Sports kwegukana igikombe cya shampiyona ndetse anatwara igihembo cy’umukinnyi w’umwaka (MVP). Uyu rutahizamu w’icyo gihe wigaragaje mu buryo butangaje, aracyibukwa nk’umwe mu bafunguye inzira y’ibihe byiza bya Gikundiro.

Eric Rutanga, wari myugariro w’ikirenga hagati ya 2017 na 2020, yibukwa cyane mu mwaka w’imikino wa 2018–2019 ubwo Rayon Sports yongeye kwegukana shampiyona, ndetse akaba umwe mu bakinnyi bitwaye neza cyane ku rwego mpuzamahanga, by’umwihariko mu mikino ya CAF Confederation Cup (CAFCC). Ubuhanga bwe mu mupira w’imiterekano n’inyota yo gutsinda byatumye ahinduka ikirangirire mu bakunzi ba Gikundiro.

Mu butumwa bwagaragaje ishema n’urukundo rw’aba bagabo b’abanyabigwi, Rayon Sports yanditse iti:

> “The door is always open to our legends!”

Mu myitozo ya mbere bafatanyije n’ikipe, abakinnyi n’abatoza babagaragarije urukundo rwinshi, mu gihe abafana bo bakomeje guhamagara amazina yabo, bibutsa ko amateka yabo atazibagirana.

Abakunzi b’iyi kipe ntibazigera bibagirwa ko Amissi na Rutanga bazahora ari #Gikundiro, ndetse n’umuryango wa Rayon Sports ukomeje kubibabwira mu ijwi riranguruye:

“Amarembo ahora afunguye ku banyabigwi bacu– murakaza neza mu rugo!”