Ihuriro rya AFC/M23 ryashinje Ingabo za Repubulika ya Demokarasi ya Congo (FARDC) n’abambari bazo kugaba ibitero bikomeye mu bice bituwemo abaturage, bakoresheje imbunda ziremereye ndetse na drones z’ubwiyahuzi.
Umuvugizi wa AFC/M23, Lawrence Kanyuka, yatangaje binyuze ku rubuga rwa X ko ibyo bitero byabaye ku Cyumweru tariki ya 17 Kanama 2025 mu bice bya Nzimbira na Kanyola, biri mu ntara ya Kivu y’Amajyepfo.
Ati: “Ihuriro ry’Ingabo z’ubutegetsi bwa Kinshasa ryagabye ibitero bikomeye mu bice bituwe cyane bya Nzimbira, Kanyola no mu nkengero zaho mu gitondo cyo ku Cyumweru, hakoreshejwe imbunda ziremereye na drones za kamikaze.”
Ni ubwa kabiri mu gihe cy’icyumweru kimwe, AFC/M23 itatse ibikorwa byo gutegura intambara ku ruhande rwa Leta ya RDC. Ku wa 12 Kanama, Kanyuka yari yatangaje ko Kinshasa ikomeje kohereza ingabo ndetse n’abarwanyi b’imitwe yitwaje intwaro irimo FDLR, Mai-Mai ndetse n’Imbonerakure, by’umwihariko mu bice byo mu Burasirazuba bw’igihugu.
Yavuze ko mu bikorwa byo gutegura imirwano, indege y’ubwikorezi ya Antonov yakoreshejwe inshuro eshanu mu kugeza abasirikare ba FARDC n’intwaro ziremereye muri teritwari ya Walikale, mu ntara ya Kivu y’Amajyaruguru, bavuye Kisangani.
Umwuka w’intambara ukomeje kuzamuka nubwo ku wa 19 Nyakanga 2025, Leta ya RDC na AFC/M23 byari byashyizeho amahame aganisha ku masezerano y’amahoro, bafashijwe na Leta ya Qatar. Ayo mahame yasabaga impande zombi guhagarika burundu imirwano n’ubushotoranyi, buri ruhande rugakomeza kuguma mu bice ruri kugenzura.
Nyamara kuva ayo mahame yashyirwaho, mu Ntara za Kivu y’Amajyaruguru na Kivu y’Amajyepfo hakomeje kumvikana imirwano hagati ya AFC/M23 n’ihuriro rya Wazalendo rishyigikiwe na Leta ya RDC.
Mu rwego mpuzamahanga, Umujyanama wa Perezida wa Leta Zunze Ubumwe za Amerika mu bufatanye na Afurika, Massad Boulos, aherutse kugaragaza ko Washington yamaganye ibikorwa by’ubugizi bwa nabi bikomeje kubangamira ubuzima bw’abasivili mu Burasirazuba bwa Congo. Yasabye impande zombi kubahiriza agahenge nk’uko zabisinyiye, kugira ngo hatangirwe inzira iganisha ku mahoro arambye.
Iyi nkuru ishingiye ku makuru yatangajwe n’Umuvugizi wa AFC/M23, bikaba bigaragaza ko intambara ikomeje kuzamuka mu Burengerazuba bwa Congo, mu gihe amahanga asaba ko hajyaho agahenge gashingiye ku masezerano mpuzamahanga.