Ihuriro Alliance Fleuve Congo (AFC) rifate umutwe wa gisirikare wa M23 ryandikiye Umunyamabanga Mukuru w’Umuryango w’Abibumbye (ONU), António Guterres, rimumenyesha ko ryavuye burundu mu mujyi wa Uvira uherereye mu Ntara ya Kivu y’Epfo, kandi ko ritazongera kubazwa ibijyanye n’umutekano w’uyu mujyi.
Mu ibaruwa yanditswe ku wa 15 Mutarama 2026, i Goma, AFC/M23 ivuga ko iki cyemezo gishingiye ku bushake bwo gukomeza kubahiriza agahenge kariho no gushaka ibisubizo bya politiki n’amahoro birambye ku kibazo cy’umutekano mu burasirazuba bwa Repubulika Iharanira Demokarasi ya Congo.
AFC/M23 yatangaje ko yashyize Umujyi wa Uvira mu maboko y’Umuryango Mpuzamahanga ku mugaragaro, isaba ko ingabo za Loni binyuze muri MONUSCO zashyiraho uburyo bwihuse kandi butabogamye bwo kurinda abasivili, nk’uko biri mu nshingano zawo.
Iri huriro ryasobanuye ko ryahagaritse burundu ishami ryaryo ry’ubugenzuzi n’ibikorwa byo gukurikirana iyegurwa ry’umujyi, rinatangaza ko ritagifite uruhare urwo ari rwo rwose mu mutekano wa Uvira.
Muri iyo baruwa, AFC/M23 yanenze cyane ko hari imitwe n’ingabo zitandukanye irimo ingabo z’u Burundi, umutwe wa FDLR, imitwe yitwaje intwaro ya Wazalendo, ndetse n’abacanshuro bashyigikiye FARDC, ivuga ko ari yo iteza Uvira umutekano muke kandi ko itari mu masezerano ayo ari yo yose ajyanye n’ibiganiro by’amahoro.
Bati “ibyo byiciro bifite intwaro bihungabanya byeruye umutekano w’abaturage b’abasivili, bigashyira mu kaga n’ibikorwa byose bigamije amahoro n’ituze mu karere kose.”
AFC/M23 yasabye Umuryango Mpuzamahanga gufata inshingano zawo mu buryo bwuzuye, ugashyiraho byihuse ingabo zitabogamye mu mujyi wa Uvira, hagamijwe kuwurinda gusubira mu mwiryane, imvururu n’ihohoterwa.
Yasoje ivuga ko iki cyemezo cyafashwe mu rwego rwo kurinda abasivili, gukomeza agahenge no gushyiraho umusingi w’amahoro arambye ashingiye ku biganiro, kubahiriza amategeko mpuzamahanga n’amahame y’uburenganzira bwa muntu.
Iyi baruwa yasinywe na Corneille Nangaa Yobeluwo, umuyobozi wa politiki wa Alliance Fleuve Congo.
