Nyuma y’amagambo yigeze kuvugwa n’uwahoze ari perezida wa Leta Zunze Ubumwe za Amerika Barrack Obama agaruka ku kuba hari ibintu byabonwe mu kirere bidafite ibisobanuro byoroshye kumva, ubu Perezida wa Leta Zunze Ubumwe za Amerika, Donald Trump, yatangaje ko agiye gutegeka inzego zibishinzwe gutangira gutegura no gusohora amadosiye ya Leta ajyanye n’ibivugwa ku binyabuzima byo mu isanzure (aliens), ibintu bidasanzwe biguruka mu kirere bizwi nka UAP (Unidentified Aerial Phenomena) ndetse na UFO (Unidentified Flying Objects).
Mu butumwa bwashyizwe ku mbuga nkoranyambaga, Trump yavuze ko bitewe n’inyungu n’amatsiko byagaragajwe n’abaturage, azaha amabwiriza Minisitiri w’Ingabo n’izindi nzego bireba gutangira inzira yo kumenya no gusohora inyandiko za Leta zifitanye isano n’ayo makuru. Yavuze ko ari “ibibazo bikomeye cyane ariko binashishikaje kandi bifite akamaro kanini.”
Ibi byatangajwe mu gihe mu myaka ishize Amerika yakunze gushyira ahagaragara raporo zitandukanye ku bintu byagaragaye mu kirere bidahita bisobanurwa. Minisiteri y’Ingabo ya Amerika (Pentagon) yigeze kwemera ko hari amashusho yafashwe n’abasirikare bayo agaragaza ibintu biguruka mu buryo budasanzwe, ariko igasobanura ko “kuba bidafite ibisobanuro ako kanya bidahita bisobanura ko ari ibiremwa byo mu yindi mibumbe.”
Barack Obama ubwe yigeze kuvuga mu biganiro byo kuri televiziyo ko hari amashusho n’inyandiko za Leta zigaragaza ibintu biguruka mu kirere bitarasobanurwa neza. Gusa ntiyigeze atangaza ko ibiremwa byo mu yindi mibumbe byemejwe nk’ukuri; ahubwo yashimangiye ko hari ibintu byagaragaye ariko bikaba bitarabonerwa ibisobanuro byuzuye.
Abasesenguzi bavuga ko hari itandukaniro rikomeye hagati yo kwemera ko hari “ibintu bitarasobanurwa” (UAP/UFO) no kwemeza ko ari “ibivejuru.” Icyuho kiri hagati y’ayo magambo ni cyo gikomeje guteza impaka ndende mu banyapolitiki, mu bashakashatsi no mu baturage.
Mu myaka ya vuba, ijambo UAP ryatangiye gukoreshwa cyane aho gukoresha UFO, hagamijwe gukuraho igisobanuro cyihuse gihuza ibyo bintu n’ibiremwa byo mu yindi mibumbe. Leta ya Amerika yashyizeho inzego zishinzwe gukusanya no gusesengura amakuru ajyanye n’ibyo bintu, mu rwego rwo kurinda umutekano w’ikirere no kumenya niba nta bihugu byaba bikoresha ikoranabuhanga ridasanzwe mu butasi.
Kwamamaza ko hazasohoka amadosiye mashya bishobora kongera gukurura impaka ku rwego mpuzamahanga, cyane cyane ku bibazo bijyanye n’umutekano, ukuri kw’amakuru ya Leta, ndetse n’uburyo amakuru ajya ahishwa igihe kirekire.
Nubwo Trump yatangaje ko hazatangira inzira yo gusohora ayo madosiye, ntiharamenyekana igihe nyacyo azashyirwa ahagaragara cyangwa urugero rw’amakuru azaba arimo. Abasesenguzi bagaragaza ko amwe mu madosiye ashobora kuzaza yasibwamo ibice by’ingenzi ku mpamvu z’umutekano w’igihugu.
Icyakora, iki cyemezo niba gishyizwe mu bikorwa gishobora kongera gukaza ibiganiro ku bijyanye n’ikorwa ry’ubushakashatsi ku buzima bwo hanze y’Isi, no ku ruhare rwa Leta mu gusangiza abaturage amakuru ajyanye n’ibintu bikomeje kuba urujijo.
Ku rundi ruhande, haracyari intera ndende hagati y’inyandiko zivuga ku bintu bitarasobanurwa mu kirere no kwemeza ku mugaragaro ko hari ibiremwa byo mu yindi mibumbe byageze ku Isi. Icyo gihe cyonyine ni cyo kizagaragaza niba ayo madosiye azasubiza ibibazo bimaze imyaka myinshi bibazwa n’abatuye isi.
DUKURIKIRE KURI WHATSAPP https://whatsapp.com/channel/0029Vad5UfC89inh67apBK2j