Imirwano ikomeye i Ndondo: MRDP-Twirwaneho ivuga ko yasubije inyuma ihuriro ry’ingabo za Leta muri Kivu y’Amajyepfo

Amakuru yizewe aturuka mu misozi y’i Ndondo, muri Grupema ya Bijombo, Teritwari ya Uvira mu Ntara ya Kivu y’Amajyepfo, yemeza ko ku wa Gatanu tariki ya 06 Gashyantare 2026 habaye imirwano ikomeye yahanganishije ihuriro ry’ingabo za Leta ya Repubulika Iharanira Demokarasi ya Congo n’umutwe wa MRDP-Twirwaneho.

Nk’uko ayo makuru abivuga, ihuriro ry’ingabo zirwanira ku ruhande rwa Leta rigizwe na FARDC, ingabo z’u Burundi, imitwe ya Wazalendo ndetse n’umutwe wa FDLR, ryagabye igitero ku birindiro bya MRDP-Twirwaneho mu misozi ya Ndondo. Icyakora, bivugwa ko ryahuye n’igisubizo gikomeye cyatumye risubizwa inyuma.

Iyo mirwano yabereye ahantu habiri h’ingenzi, ari ho Kirungwa na Gishembwe, uturere two mu misozi igabanya i Ndondo n’umujyi wa Uvira. Aho hantu hafite akamaro kanini mu by’umutekano, kuko ari inzira z’ingenzi zihuza imisozi ya Bijombo n’ibice byegereye ikiyaga cya Tanganyika, bikagira uruhare rukomeye mu kugenzura ingendo z’abantu n’ibikoresho bya gisirikare.

Abaturage baho n’abandi bakurikiranira hafi iby’umutekano muri ako gace bavuga ko ihuriro ry’ingabo za Leta ryagize igihombo gikomeye. Umwe mu batanze amakuru yagize ati: “Igitero cyagabwe ku wa Gatanu cyabaye ihurizo rikomeye ku ngabo za Leta. MRDP-Twirwaneho yasubije inyuma FARDC, ingabo z’u Burundi, Wazalendo na FDLR, ibirukana kuri iriya misozi y’i Ndondo.”

Ayo makuru akomeza avuga ko kugeza ubu MRDP-Twirwaneho igenzura imisozi yose yo muri Ndondo, kuva ku mipaka yayo kugeza mu bice byo hejuru bifitanye isano n’umutekano w’umujyi wa Uvira. Ibi byongeye kongera impungenge ku hazaza h’uyu mujyi ufatwa nk’ingenzi mu by’ubucuruzi n’umutekano w’akarere.

Ku ruhande rwa Leta, amakuru aturuka muri ako gace yemeza ko habaye igihombo cy’abasirikare, ndetse n’ifatwa ry’ibikoresho bya gisirikare birimo imbunda ziremereye. Ibi byerekana ko igitero cyari cyateguwe, ariko ntikigire umusaruro wari witezwe.

Nubwo MRDP-Twirwaneho itigeze itangaza ku mugaragaro ibihombo byayo, amakuru yizewe avuga ko uyu mutwe wifashishije cyane ubumenyi bw’aho hantu n’imiterere y’imisozi ya Ndondo, ibintu byawuhaye amahirwe yo guhangana n’ingabo zari ziwugabyeho igitero.

Imisozi ya Ndondo imaze igihe kinini ifatwa nk’ahantu hagoye kugerwamo, ikaba yaragiye ikoreshwa n’impande zitandukanye mu bihe bitandukanye by’intambara yo mu Burasirazuba bwa RDC. Kuba ihuza inzira zerekeza muri Uvira, Fizi n’ahandi, bituma ihora ifatwa nk’ahantu h’ingenzi mu bya gisirikare.

Iyi mirwano yongeye kugaragaza ko ikibazo cy’umutekano muke muri Kivu y’Amajyepfo kigifite uburemere bukomeye, ndetse ko n’ubufatanye bw’ingabo za Leta n’iz’amahanga butaragera ku ntego yo kugarura amahoro arambye muri aka gace.

Aya makuru aniyongera ku yandi yavugaga ifatwa ry’umuyobozi w’abacanshuro ba Blackwater bivugwa ko bari baraje gufatanya na FARDC mu mirwano yo mu Burasirazuba bwa RDC. Amakuru aturuka ku rugamba avuga ko uwo muyobozi yafatiwe muri Uvira, nyuma akagezwa mu maboko y’ihuriro AFC/M23. Haravugwa kandi ko yafatanwe n’abandi bantu bane, mu gihe hari abandi munani bari barafashwe mbere, ibintu bikomeje guteza impaka ku ruhare rw’abacanshuro b’abanyamahanga mu ntambara yo muri RDC n’ingaruka zabyo ku mutekano w’akarere.

Abasesenguzi mu bya politiki n’umutekano bemeza ko mu gihe hatabayeho ingamba zirambye zishingiye ku biganiro bya politiki, iterambere ry’akarere n’ubwiyunge bw’abaturage, imirwano nk’iyi izakomeza, bigatuma abasivili bakomeza kuba mu byago.

DUKURIKIRE KURI WHATSAPP CHANNEL UJYE UBONA AMAKURU TUBAGEZAHO KU GIHE https://whatsapp.com/channel/0029Vad5UfC89inh67apBK2j