Uru ruganda Joyland Company Ltd, ruzwiho gukora imitobe ya SALAMA Juice, rwari rumaze imyaka rufite ibyangombwa byose by’ubuziranenge byatanzwe n’inzego z’igihugu, harimo Rwanda Standards Board (RSB) na Rwanda Food and Drugs Authority (Rwanda FDA).
Ariko nubwo rwari rwarahawe ibyangombwa byemewe, ubu rwarahagaritswe nyuma yo kugaragara ko rutubahiriza ibisabwa n’amategeko, ndetse rukora n’ibidahuye n’ibyo rwemerewe.
RSB na Rwanda FDA bari barahaye Joyland ibyangombwa by’ubuziranenge
Amakuru dufitiye gihamya yerekana ko Joyland Company Ltd yari yarahawe icyemezo cya RSB ku wa 20 Ukwakira 2023, cyemeza ko Salama Pineapple Flavoured Soft Drink y’uru ruganda yujuje ibisabwa n’amabwiriza ya RS 79:2023 – Fruit Flavoured Soft Drinks Specification.
Icyo cyemezo cyari gifite agaciro kugeza ku wa 19 Ukwakira 2025, kikaba cyarasinywe na Murenzi Raymond, Umuyobozi Mukuru wa RSB.
Uretse icyo, Rwanda FDA nayo yatanze icyemezo cya GMP (Good Manufacturing Practices) ku wa 1 Nzeri 2024, nyuma yo gukora igenzura ryimbitse ku wa 14 na 15 Ugushyingo 2024.
Icyo cyangombwa cyari gihamya ko uru ruganda rukora ibinyobwa bidafite alcool (Fruits Flavoured Soft Drinks – SALAMA Juice) mu buryo bwubahiriza amategeko, kikazamara imyaka itanu kuva ku itariki cyatangiweho.
Ibyo byemezo byose byagaragazaga ko Joyland Company Ltd ari uruganda rukora mu buryo bwemewe, rukurikiza amabwiriza y’isuku, ubuziranenge n’imikorere yemewe n’inzego z’ubugenzuzi.
Uko uruganda rwaje kurenga ku mategeko rugahagarikwa
Nyamara, mu bikorwa by’igenzura ngarukamwaka byakozwe mu cyumweru gishize n’inzego zitandukanye zirimo RIB, Rwanda FDA na RSB, byagaragaje ko ibintu byahindutse.
Aho uruganda rukorera hasanzwe umwanda mwinshi, ndetse amakuru yatangajwe na RIB yemeza ko Joyland yatangiye gukora ibindi bicuruzwa bitari muri gahunda y’uruhushya rwayo.
Umuvugizi wa RIB, Dr Murangira B. Thierry, yemeje ko uru ruganda rwatangiye gukora ibintu bitari mu byemerewe gukorwa, agira ati:
> “Joyland Company yahawe icyangombwa cyo gukora imitobe, ariko nyuma yiyongereyeho gukora ibizwi nka steel wires (insinga zifashishwa mu byuma). Ibi ntibyari mu byo yemerewe, kandi aho rukorera hari n’umwanda mwinshi. Ibyo byose byatumye ruhagarikwa by’agateganyo.”
Dr Murangira yakomeje avuga ko iri hagarikwa ryakozwe mu rwego rwo kurinda ubuzima bw’abaturage no gukumira icuruzwa ry’ibicuruzwa bishobora guhungabanya ubuziranenge bw’ibiribwa biri ku isoko.
Igenzura rya USALAMA XI-2025 ryagaragaje ibindi bibazo byinshi
Ibi bikorwa byo gusuzuma ubuziranenge byabaye mu rwego rwa gahunda ngarukamwaka ya USALAMA XI – 2025, igamije kurwanya ibicuruzwa bitujuje ubuziranenge, ibitemewe n’ibyinjizwa mu gihugu mu buryo bwa magendu.
Mu cyumweru kimwe gusa, inzego z’ubugenzuzi zatangaje ko:
Abantu 72 bafashwe bakekwaho gucuruza cyangwa gukwirakwiza ibicuruzwa bitujuje ubuziranenge,
Inganda 4 zirimo Joyland Company Ltd zafunzwe by’agateganyo,
Pharmacies 8 zafatiwe mu bikorwa byacururizwagamo imiti itujuje ibisabwa.
Ibicuruzwa byose byafashwe muri icyo gikorwa bifite agaciro ka miliyoni 106 z’amafaranga y’u Rwanda, birimo ibinyobwa (bisembuye n’ibidasembuye), ibiribwa, amavuta yo kwisiga, imiti n’ibiyobyabwenge.
Birakekwa ko Joyland yiraye nyuma yo guhabwa ibyangombwa
Abasesenguzi mu bijyanye n’inganda n’ubuziranenge bavuga ko hari aho usanga uruganda rumaze kubona ibyangombwa rukirara rukirengagiza amabwiriza y’isuku n’igenzura, bigatuma rugaragara mu makosa nyuma y’igihe gito.
Birashoboka ko aribyo byabaye kuri Joyland Company Ltd, nk’uko bivugwa n’inzego z’ubugenzuzi.
Uru ruganda rwari rumaze kumenyerwa ku isoko ry’u Rwanda kubera imitobe yarwo ya SALAMA Juice, ariko ubu ruri mu bibazo bikomeye nyuma yo kugaragara ko rutubahiriza ibisabwa n’amategeko n’isuku mu mikorere yarwo.
Nubwo rwari rufite ibyangombwa byose byemewe, rwaje kwitandukanya n’amabwiriza rwiyemeje gukurikiza, bituma rufatirwa ibihano n’inzego z’ubugenzuzi.
Kugeza ubu, ibikorwa by’uru ruganda byahagaritswe by’agateganyo mu gihe iperereza rikomeje, kugira ngo hamenyekane niba koko rwakoze ibitemewe ku bushake cyangwa ari amakosa y’imikorere asanzwe.