I Johannesburg muri Afurika y’Epfo ahari kubera inama y’abakuru b’ibihugu n’ibihugu bikize ku Isi (G20) yatangiye kuri uyu wa Gatandatu washize, Perezida w’u Bufaransa Emmanuel Macron yongeye gushyira igitutu ku mutwe wa AFC/M23 n’abawushyigikiye, avuga ko nta bushake ugaragaza mu gufungura ikibuga cy’indege cya Goma kimaze amezi gifunze.
Ubwo yaganiraga n’itangazamakuru i Johannesburg, Macron yavuze ko kuvuga ko “U Rwanda rutigeze rushyigikira M23” bidahura n’ukuri, ashingiye ku kuntu uyu mutwe ukomeje kugenzura no gufunga ikibuga cya Goma mu buryo buburizamo gahunda z’ubutabazi.
Ati “Ntabwo mbona ko M23 n’abafite ikibuga cya Goma bakoze ibikenewe ngo gifungurwe, mu gihe RDC yo yujuje ibyo yasabwaga ku bijyanye n’imicungire n’imiyoborere.”
Macron yavuze ko gufungwa kw’iki kibuga, kimwe mu byangombwa bikenewe cyane mu gutanga ubutabazi mu burasirazuba bwa RDC, ari “ikibazo gikomeye kigaragaza ko hari ubundi bushake buburamo.”
Asaba ko gifungurwa byihutirwa
Perezida w’u Bufaransa yasabye ko impande zose zirebwa n’ubutabazi; RDC, M23 ndetse n’abafatanyabikorwa mpuzamahanga, zihita zifata icyemezo cyihuse kugira ngo indege z’inkunga zibashe kugera ku baturage bari mu bihe bikomeye by’umutekano muke.
Yavuze ko “kudakora ibikwiriye mu gihe abaturage barimo gupfa kubera inzara n’icuraburindi cya gisirikare” ari ibikorwa bidakwiye kwihanganirwa.
Goma Airport: amasezerano ku mpapuro, intambara ku butaka
Mu Ukwakira 2025, mu nama yabereye i Paris, hatangajwe ko ikibuga cy’indege cya Goma kigomba gufungurwa “mu byumweru biri imbere” ariko ku mpamvu z’ubutabazi gusa. Icyo gihe AFC/M23 yanze ibyo ivuga ko “bidakurikije ukuri guhari” ndetse ko hari ibibazo by’umutekano bitarakemurwa.
Kugeza magingo aya, nubwo ibiganiro byo kubungabunga amahoro biri gukorwa n’abanyapolitiki b’i Doha bigenda bigaragaza intambwe ku mpapuro, ku butaka ibintu ni ibindi: imirwano iracyakomeje mu bice bitandukanye, imihanda yarangiritse, ubutabazi bwarahagaze, naho ikibuga cya Goma gikomeza kuba igikoresho cya politiki n’ingufu z’intambara.
RDC yo ivuga ko yujuje ibisabwa
Ku ruhande rwa Leta ya Repubulika Iharanira Demokarasi ya Congo, ivuga ko ibyo yasabwaga byose ku bijyanye n’imiyoborere, imitegurire n’umutekano by’ikibuga “byamaze gukorwa,” ku buryo nta mpamvu ishingiye ku buyobozi yabuza ko gikora.
Ibi ni byo Macron yifashishije mu gutera igishyika M23 n’abayishyigikiye, avuga ko impamvu zitangwa “zidafite ishingiro.”