Impinduka ikomeye kandi itunguranye yabaye mu mupira w’amaguru muri Afurika: igikombe cya CAN 2025 cyahawe Maroc nyuma y’aho Sénégal itewe mpaga ku mukino wa nyuma, nubwo ari yo yari yatsinze mu kibuga.
Urwego rushinzwe umupira w’amaguru muri Afurika, Confederation of African Football, rwatangaje ko nyuma yo gusuzuma ubujurire hashingiwe ku ngingo ya 84 y’amategeko agenga irushanwa rya CAN, Ikipe y’Igihugu ya Senegal intsinzi yayo yateshejwe agaciro ku mukino wa nyuma wa CAN 2025 wabereye muri Morocco. Ibi byatumye uwo mukino ufatwa nk’aho Sénégal yawutsinzwe ibitego 3–0 ku mpamvu z’amategeko, bityo igikombe gihita gihabwa Maroc.
Uwo mukino wari wabaye ku wa 19 Mutarama 2026, warangiye Sénégal itsinze igitego 1–0 cyatsinzwe na Pape Gueye mu minota y’inyongera. Icyo gihe byari ibyishimo bidasanzwe i Dakar no hirya no hino mu gihugu, aho abaturage basohotse mu mazu yabo bakuzura imihanda bishimira kwegukana igikombe cya Afurika ku nshuro ya kabiri.
Ariko nyuma y’iminsi mike, impaka zatangiye kuzamuka ku byerekeye amategeko y’amarushanwa, byatumye Confederation of African Football isuzuma niba hari amakosa yateye uwo mukino kudakurikiza amategeko. Nyuma y’ubujurire bwatanzwe n’Ishyirahamwe ry’Umupira w’Amaguru rya Maroc, Fédération Royale Marocaine de Football, hafashwe icyemezo cyo gutesha agaciro intsinzi ya Sénégal.
Mu itangazo ryasohotse, CAF yavuze ko Sénégal ifatwa nk’iyatsinzwe mpaga ku mukino wa nyuma, maze igikombe gihabwa Maroc nk’iyari mukeba wayo muri uwo mukino. Ibi byahinduye amateka mu kanya gato, kuko igikombe cyari kimaze iminsi gifitwe na Sénégal cyahise gihindurirwa nyiracyo.
I Dakar, umurwa mukuru wa Sénégal, abaturage benshi bagaragaje akababaro n’uburakari. Bamwe bavuze ko ari uburenganzira bwabo bwibwe, abandi bavuga ko politiki n’inyungu z’ibihugu bikomeye ari byo byagize uruhare muri icyo cyemezo. Abafana bari bamaze baranezerewe ibirori byo kwishimira igikombe bongeye kwisanga mu gahinda, bamwe bagasaba ko habaho ubujurire bushya cyangwa ko ikibazo cyashyikirizwa izindi nzego mpuzamahanga.
Ku rundi ruhande, i Rabat no mu yindi mijyi ya Maroc, ibyishimo byongeye kubura aho bijya. Nubwo hari bamwe mu bafana bavuze ko byari kuba byiza igikombe gitangiwe mu kibuga, benshi bashimangiye ko amategeko agomba kubahirizwa kurusha ibyabereye mu kibuga.
Abasesenguzi ba siporo bavuga ko iki ari kimwe mu byemezo bikomeye byafashwe mu mateka ya CAN, kuko ari gake cyane igikombe gihindurirwa nyiracyo nyuma y’umukino wa nyuma. Banagaragaza ko bizagira ingaruka ku cyizere abafana bagirira amarushanwa ya CAF, cyane cyane ku bijyanye no gukemura amakimbirane.
Icyo abantu benshi bategereje ubu ni ukumenya niba Sénégal izemera icyo cyemezo cyangwa niba izakomeza inzira z’ubujurire. Ariko uko byagenda kose, amateka ya CAN 2025 yamaze guhinduka: igikombe cyanditswe kuri Maroc, naho Sénégal isigara ifite igikomere cy’intsinzi yakuweho n’icyemezo cyo hanze y’ikibuga.
Ni inkuru izakomeza kuvugwa igihe kirekire, kuko ituma hibazwa niba koko umupira w’amaguru utsindirwa mu kibuga gusa cyangwa niba amategeko ashobora guhindura byose mu kanya nk’ako guhumbya. Ba uwa mbere ku makuru yacu https://whatsapp.com/channel/0029Vad5UfC89inh67apBK2j