“Twakoraga ijoro n’amanywa ariko amafaranga turayabura” abakorerabushake bakoze mu irushanwa rya UCI barataka kwamburwa

Mu minsi icumi ishize, irushanwa mpuzamahanga ry’amagare rya UCI Road World Championships Kigali 2025 ryabereye mu Rwanda ryagaragaje isura nziza y’igihugu ku rwego mpuzamahanga. Ariko inyuma y’iyi ntsinzi, hari ikibazo gikomeye cyugarije urubyiruko rw’Abanyarwanda rwitabiriye iri rushanwa nk’abakorerabushake.

Abakorerabushake bo mu murenge wa Niboyi bavuga ko bagize uruhare rukomeye mu migendekere y’iri rushanwa, bakora amasaha menshi, bakarinda ibyuma n’ibikoresho ku manywa na n’ijoro kugira ngo hatagira ikibazo kivuka ku mihanda. Icyakora nyuma y’ibi byose, bavuga ko batashoboye kubona amafaranga bakoreraga nk’insimburamubyizi kandi bafite n’izindi mbogamizi zatewe n’uko amafaranga yabo atarishyurwa.

Umwe muri abo bakorerabushake yandikiye itangazamakuru avuga ati:
“Mwiriwe neza? ndi umwe mu bakozi bakoraga mu irushanwa ry’amagare rya USI nk’umukorerabushake. Twakoreraga mu murenge wa Niboyi, twakoraga ijoro n’amanywa turinze ibyuma ku muhanda twakoze iminsi 10 bari kuduha ibihumbi 10,000rwf nk’insimburamubyizi maze amarushanwa arangiye baduhemba 35k kandi twabaga twagujije amatike, tukirirwa ku zuba imvura ikatunyagira ariko tukaguma turinze ibyo byuma ngo hatagira ikibazo kivuka mu irushanwa ariko birangiye amafaranga turayabura, mudukorere ubuvugizi kuko dufite ibibazo byinshi cyane.”

Iri jambo ryuzuyemo uburakari n’agahinda k’abakorerabushake rishimangira ukuntu bahoze bitanga nta nyungu zihuse, bakora mu bihe bigoye. Bavuga ko igihe cyose irushanwa ryari riri mu nzira, babanje gushyira imbere inshingano zabo,  ku zuba ryinshi ndetse no mu mvura ikomeye kugira ngo bahagararire umutekano w’abahataniye amarushanwa n’abareba iri rushanwa.

Banasobanura ko ku munsi wose bakoze, bakoreraga amafaranga ibihumbi 10,000Frw nk’insimburamubyizi, ariko nyuma y’amarushanwa bahawe amafaranga ibihumbi 35,000Frw gusa, ibintu bitajyanye n’ibyo bari biteze kandi batashoboye kubona ibisobanuro bihagije ku mpamvu y’iki kibazo. Baravuga ko baguze amatike yo gukora aka kazi, bagaragaza ko batagize ubwisanzure mu mikorere yabo, kandi ko byabababaje kubona ko nyuma y’akazi katoroshye, inyungu yabo ari nto cyane.

Ibi bikaba byagaragaje ikibazo cyo kudaha agaciro imbaraga z’urubyiruko rw’Abanyarwanda, cyane cyane muri gahunda z’ingenzi z’igihugu zishobora kugirira akamaro igihugu mu rwego rw’iterambere n’iyamamazwa ku rwego mpuzamahanga.

Abakorerabushake basaba ubuyobozi bwa UCI hamwe n’abategura irushanwa gukemura iki kibazo, bakabaha inyishyu zujuje ibyo bari barasezeranyijwe. Banasaba ko hakorwa igenzura ryimbitse ku micungire y’akazi k’abakorerabushake kugira ngo ibibazo nk’ibi bitazongera kubaho mu bihe biri imbere.

Iki kibazo kiragaragaza ko nubwo irushanwa rya UCI ryatanze isura nziza ku Rwanda no ku rubyiruko rwarigizemo uruhare, hakiri inzitizi mu micungire y’umusaruro w’akazi katoranyijwe. Abakorerabushake bavuga ko bafite ibyifuzo byinshi, harimo gukomeza gufatanya mu bikorwa by’iterambere ry’igihugu ariko banifuza ko ibikorwa nk’ibi byitabwaho mu buryo bw’umwuga kandi bigashyirwa mu mucyo w’inyishyu.