U Bwongereza bwatangaje ku mugaragaro ko buzemera Palestine nk’igihugu kigenga mu nteko rusange ya Loni

Minisitiri w’Intebe w’u Bwongereza, Keir Starmer, yatangaje ko igihugu cye gishobora kwemera Leta ya Palesitina nk’igihugu cyigenga ku mugaragaro mu Nteko Rusange y’Umuryango w’Abibumbye iteganyijwe muri Nzeri 2025, keretse gusa igihe Leta ya Israel ikoze impinduka zifatika mu buzima bw’Abanyapalesitina.

Ibi byatangajwe mu gihe igitutu mpuzamahanga gikomeje kwiyongera ku butegetsi bwa Tel Aviv, gisabwa kugabanya ibikorwa byo gukandamiza abaturage ba Palesitina mu gace ka Gaza no mu Ntara ya Cisjordanie.

Starmer yavuze ko “U Bwongereza bushyigikiye igisubizo cy’imibanire y’ibihugu bibiri—Israel na Palesitina, byombi bigendera ku mahoro n’umutekano. Ariko uko ibintu bikomeje kujya imbere, dufite inshingano zo gutanga ubutumwa bukomeye. Rero, niba Israel iterekanye ubushake bwo guhindura ibintu, tuzashyigikira ishingwa ryemewe rya Leta ya Palesitina mu Nteko ya Loni.”

Mu byo u Bwongereza busaba Israel harimo:

Guhagarika iyubakwa ry’imiturire y’Abayahudi mu bice bya Palesitina;

Kugabanya igitugu n’ibihano ku baturage ba Gaza;

Kwemera inzira igaragara iganisha ku mahoro arambye n’ibiganiro bifatika n’ubuyobozi bwa Palesitina.

Iyi ngingo ije mu gihe hari ibihugu byinshi birimo Espagne, Norvège na Irlande biherutse gutangaza ko byemera Leta ya Palesitina, ibyo bikaba byaratumye Israel isubiza abahagarariye ibyo bihugu. U Bwongereza, nk’umunyamuryango w’ingenzi mu kanama ka Loni gashinzwe umutekano ku Isi, bwitezweho kugira uruhare rukomeye mu gushyira igitutu kuri Israel ngo yemere ibiganiro bihamye.

Abasesenguzi mu bya dipolomasi bavuga ko iyi mvugo ya Starmer ari intambwe ikomeye, igaragaza ubushake bwa guverinoma nshya y’Abadepite b’Abakozi (Labour) mu gukemura ikibazo cya Palesitina gikomeje kuba agatereranzamba mu Karere ko mu Burasirazuba bwo Hagati.

Uru rugendo rushobora kugera ku ntego niruramuka rufashijwe n’ibindi bihugu bikomeye, ndetse n’Ubunyamabanga Bukuru bwa Loni, nk’uko bamwe mu badipolomate ba UN babitangaje.

Source: Reuters