Urukiko rw’Ibanze rwa Nyarugenge rwategetse ko Shema Arnaud De Bosch uzwi ku izina rya DJ Toxxyk afungwa iminsi 30 y’agateganyo mu Igororero rya Nyarugenge riri i Mageragere, nyuma yo gusanga hari impamvu zikomeye zimushinja ibyaha bitatu, mu gihe rwatesheje agaciro icyaha kimwe yari akurikiranyweho.
Uyu mwanzuro wasomwe ku wa 21 Mutarama 2026, nyuma y’iburanisha ryabaye ku wa 17 Mutarama 2026, rishingiye ku byaha DJ Toxxyk akekwaho byakozwe ku wa 21 Ukuboza 2025.
Urukiko rwatangaje ko DJ Toxxyk yagonze umupolisi witwa Mushabe Fred, wakoreraga ku muhanda wa peyaje mu Mujyi wa Kigali, maze nyuma akaza guhunga aho impanuka yabereye. Yaje gufatirwa mu Karere ka Karongi.
DJ Toxxyk yemeye ibyaha bibiri birimo kwica bidaturutse ku bushake n’icyaha cyo guhunga amaze guteza impanuka. Icyakora yahakanye ibyaha bibiri ari byo kwanga gupimwa hakoreshejwe icyuma gipima ibisindisha n’icyaha cyo gukoresha ibiyobyabwenge cyangwa urusobe rwabyo.
Impamvu Ubushinjacyaha bwashingiyeho
Ubushinjacyaha bwasabye ko DJ Toxxyk afungwa iminsi 30 y’agateganyo, bushingiye ku mpamvu zirimo ko iwe mu rugo hafatiwe udupfunyika tw’urumogi, ndetse ko hari abatangabuhamya barimo umukozi wo ku muhanda wa peyaje n’umupolisi wari aho impanuka yabereye.
Bwongeyeho ko hari raporo z’inzego z’ibanze zemeza ko DJ Toxxyk akoresha urumogi, ndetse n’amashusho yafatiwe mu kabari ka Kigali Universe aho yari yamaze ijoro ryabanjirije impanuka.
Ubushinjacyaha bwavuze ko ifungwa rye ry’agateganyo ryafasha iperereza no kumwizeza ko adatoroka ubutabera.
Icyemezo cy’Urukiko
Mu busesenguzi bwarwo, Urukiko rwasanze ku cyaha cyo gukoresha ibiyobyabwenge, hari impamvu zikomeye zimushinja kuko yabyemereye mu bugenzacyaha, kandi akanasinya inyandiko yemeza ko iwe hafatiwe urumogi.
Ku cyaha cyo kwanga gupimwa ibisindisha, Urukiko rwasanze nta bimenyetso bifatika bihari, bityo rutegeka ko adakomeza kugikurikiranwaho.
Urukiko rwasanze kandi kuba DJ Toxxyk yaravuye i Kigali akerekeza i Karongi nyuma y’impanuka bishobora kugaragaza impamvu yo gutinya ko yatoroka ubutabera.
Bityo, rwategetse ko afungwa iminsi 30 y’agateganyo, rumwibutsa ko afite iminsi itanu (5) yo kujuririra uwo mwanzuro. Yategetswe gufungirwa mu Igororero rya Nyarugenge guhera umunsi icyemezo cyasomewe mu ruhame.