Urwego ngenzuramikorere RURA rwahamagaje MTN Rwanda ngo yisobanure ku mpamvu z’imitangire idahwitse ya service imaze iminsi iha abakiriya bayo

Urwego Ngenzuramikorere (RURA) rwahagurukiye ibibazo bikomeje kugaragara mu mikorere ya MTN Rwanda, birimo serivisi z’amajwi (voice), ubutumwa bugufi (SMS), serivisi za USSD ndetse n’ibibazo mu guhanahana amakuru hagati y’abatanga serivisi zitandukanye (interconnect traffic), byakomeje kwinubirwa n’abakiriya mu gihugu hose.

Mu itangazo ryasohowe kuri uyu wa mbere ushize, RURA yatangaje ko yahamagaje ubuyobozi bwa MTN Rwanda aho bwitaba kuri uyu wa kabiri saa tatu za mu gitondo (9:00 AM), kugira ngo busobanure impamvu y’ibi bibazo bidasiba kwisubiramo, kandi bigira ingaruka zikomeye ku ireme rya serivisi abakiriya bahabwa.

“Nk’uko biteganywa n’amategeko, MTN Rwanda yatumijwe kugira ngo hatangwe ibisobanuro bifatika kuri ibi bibazo, ndetse hanatangwe ingamba zihamye zizatuma bidakomeza kwiyongera cyangwa kwisubiramo,”  itangazo rya RURA.

Ibibazo Bikunze Kugaragara

Mu iyi minsi , bamwe mu bakiriya ba MTN Rwanda bagaragaje ko serivisi z’itumanaho zidasubiza ku gihe cyangwa ntizikore neza. Harimo:

Kudahamagara cyangwa guhamagarwa byanga, cyane cyane mu masaha ya nijoro cyangwa mu masaha y’akazi;

Ubutumwa bugufi (SMS) butinda cyangwa ntibugere ku bo bugenewe;

USSD (nko gukoresha *182#, *134# n’zindi) idakora neza cyangwa ikagenda biguru ntege;

Kunanirwa guhanahana amakuru hagati ya MTN n’abandi batanga serivisi, bigatera ikibazo mu mikoranire hagati y’ingo zihuza imiryango itandukanye (interconnection problems).

Abakoresha serivisi za MTN bemeza ko ibi bibazo bimaze igihe, kandi bishyira mu kaga ibikorwa by’ubucuruzi, itumanaho rishingiye ku ikoranabuhanga, ndetse bikadindiza iterambere ry’ikoranabuhanga mu gihugu.

MTN Rwanda Itegerejweho Ibisobanuro Bihagije

Ubuyobozi bwa MTN Rwanda buhagarariwe n’umuyobozi mukuru, burasabwa kugaragaza impamvu nyamukuru zitera ibi bibazo ndetse n’ingamba zifatika zizatuma bidakomeza kwangiza icyizere cy’abakiriya.

RURA yavuze ko ishingiye ku igenzura n’ubushishozi bukorwa buri gihe, itazihanganira imikorere mibi ishobora gushyira mu kaga abakoresha serivisi z’itumanaho. Kuri iyi nshuro, uru rwego rwatangaje ko rwatangiye inzira yo gusuzuma niba hari ingingo z’amategeko zishobora gukoreshwa kugira ngo habeho guhana cyangwa guhindura uburyo MTN itanga serivisi.

Mu minsi ishize, RURA yashyize imbaraga mu gucunga no kugenzura ireme rya serivisi z’itumanaho zitangwa mu Rwanda, aho yagiye ihana ibigo byagaragayeho kunanirwa kuzuza inshingano. Iri genzura rishingiye ku nyungu rusange z’abakiriya ndetse no guteza imbere ihangana rishingiye ku ireme rya serivisi.

Nubwo hataratangazwa umwanzuro w’ibiganiro RURA yagiranye na MTN kuko n’inama biratangiriraho itaragera, hari icyizere ko biratanga umusaruro uhamye, bityo serivisi z’itumanaho mu Rwanda zikagera ku rwego rwo hejuru rwizewe.