Nitwa Diane. Navukiye i Gicumbi, mu muryango utishoboye. Data yapfuye ndi muto, mama akora amasuku hirya no hino kugira ngo mbashe kujya ku ishuri. Nize amashuri yisumbuye ntagira isaha y’ikiruhuko; iyo abandi bajyaga kugura icyayi, njye nanywaga amazi nkareba mu ndorerwamo y’inkongoro. Ariko sinigeze nteshuka. Narize, ngera ku cyiciro cya kabiri cya kaminuza, ubwo nibwo namumenye: Eric.
Yari umugabo w’imyaka 37, w’umukire, wubatse inzu eshatu mu mugi wa Kigali. Yankundiye mu nzira z’inzozi: yatangiye kuncumbikira, kunyishyurira ishuri, no kumpa agaciro nari narabuze kuva navuka. Sinari nzi ko mbaye imbata y’urukundo rw’ubugome.
Hashize umwaka turyamana, nuko umunsi umwe ambwira ko umugore we yamuretse, ko azantwara nkimara kurangiza amashuri. Naramwemeye, ndamukunda by’ukuri. Umunsi umwe, nagize ikibazo cy’uburwayi. Muganga arambwira ati:
– Wanduye agakoko gatetera SIDA.
Nari mu gahinda. Nagiye kwa Eric kumubwira ayo makuru. Arandeba, araseka, arambwira ati:
– Sha Diane, uri umwana mwiza. Ariko ntugire ngo ndi igikoresho cyo kugukiza ubukene bwawe.
Natekerezaga ko arimo kunshimagiza, ariko yahise ankubita amagambo ahwanye nk’inkota muri nge:
– Nari nzi ko ushaka kwiga gusa, nguha amafaranga n’ibindi. None ushaka no kuzanyangisha umugore n’abana? Reka nkubwire: nta mugore wanjye wigeze agenda. Aracyariho, kandi nta mugore nkawe wagombaga kumusimbura.
Narahagurutse, ndagenda. Ayo magambo yaramvuzeho yatumye mbira icyuya ku mutima. Nagendaga ndira, numva isi ari nto. Nararwaye, ntangira kugurisha ibyange byose ngo nivuze. Mama ntiyari azi ibyo ndwaye. Amaherezo yaje kubimenya, aza ansanga ku bitaro ndwaye, yicara iruhande rwanjye, andwanaho nk’umubyeyi mbese. Nyuma y’ukwezi kumwe, yaje kwicwa n’agahinda. Yarapfuye, ansize jye njyenyine, mu buzima bwari bwamaze kuzima.
Eric ntiyigeze ansura. Ahubwo nari naramaze kumenya ko hari abandi banyeshuri bane yaryamanaga na bo. Bane! Bose ababeshya ko azashyingiranwa na bo, ko atagifite umugore. Ababeshya urukundo, abashora mu mwijima.
Nyuma y’imyaka itatu, namubonye mu modoka ihenze ari kumwe n’umugore we n’abana. Yararebye anyuraho, amwenyura nk’utigeze amenya izina ryanjye.
None dore ndi hano, mfite imyaka 29, niga kudoda i Gikondo, ngerageza kwiyubaka. Nanditse iyi nkuru bitari uko nicujije ko namukunze, oya… ahubwo nicujije ko namwizeye kurusha mama wambyaye.
ISOMO
Si buri wese ukubwira ko agukunda ngo abe abivuze kubera urukundo. Hari abagukunda kubera uko usa, hari abakugendaho kubera uko usa.
Hari ababeshya bakoresheje impano, bakagukata umutima nk’icyuma cyaciye mu rugori.
Urukundo ni rwiza, ariko urutavuzwe n’umutima, ni icyobo kinini cyuzuye uburyarya n’ibikomere.