🔥Ibitaramo Byahindutse Ikigeragezo: Will Smith Arezwe n’Umucuranzi Bakoranye

Los Angeles, Leta Zunze Ubumwe za Amerika — Umuhanzi w’icyamamare ku isi hose, Will Smith, ari mu mazi abira nyuma y’uko arezwe mu rukiko n’umucuranzi wa violoni wakoranye na we, amushinja ihohoterwa rishingiye ku gitsina no kumwirukana mu kazi mu buryo bunyuranyije n’amategeko.

Uwareze ni Brian King Joseph, umucuranzi wa violoni uzwi cyane muri Amerika, wanamenyekanye mu irushanwa America’s Got Talent. Yatanze ikirego cye ku itariki ya 30 Ukuboza 2025, mu Rukiko Rukuru rwa Los Angeles County, avuga ko yakoreye Will Smith mu rugendo rwe rw’ibitaramo byo kumenyekanisha album ye yise “Based on a True Story” mu mwaka wa 2025.

Mu kirego cye, Brian King Joseph avuga ko mu gihe yakoraga muri urwo rugendo rw’ibitaramo, yagiye ahura n’imyitwarire itamworoheye kandi yamushyiraga mu bwoba, avuga ko yumvaga atewe igitutu n’imimerere yakoreragamo.

Avuga ko mu kwezi kwa Werurwe 2025, ubwo bari mu mujyi wa Las Vegas, yagarutse mu cyumba cya hoteli yari yarateganyirijwe n’itsinda rya Will Smith, asanga hari ibimenyetso by’uko hari uwinjiye mu cyumba cye atabizi. Muri ibyo, avuga ko yahasanze:

urwandiko rwandikishijwe  intoki rufite ubutumwa yamufashe nk’iterabwoba,

icupa rya byeri,

isakoshi atari iye,

n’imiti ifitanye isano n’indwara ya VIH yanditswe ku wundi muntu.

Brian King Joseph avuga ko ibi byamuteye ubwoba bukabije, ahita abimenyesha abashinzwe umutekano wa hoteli, akanahamagara inzego z’umutekano, ndetse akanabigeza ku bayobozi b’urugendo rw’ibitaramo.

Nk’uko abyivuga, aho gufashwa no kurengerwa, ngo yaje gushinjwa kuba yarahimbye inkuru, nyuma aza gukurwaho mu rugendo rw’ibitaramo, ibintu afata nk’igihano cyamufatiwe kubera gutanga amakuru ku byo yari yahuye na byo.

Mu kirego cye, avuga ko kwirukanwa kwe kwamuteye:

ihungabana rikomeye mu mutwe,

gutakaza akazi n’amafaranga,

no kugira ihungabana rikomeje (PTSD), nk’uko abivuga.

Asaba ko urukiko rwamugenera indishyi z’akababaro, iz’ukwangirika k’izina rye n’iz’ubukungu, ndetse n’ibindi bihano byafatirwa uregwa mu gihe yaba ahamwe n’icyaha.

Abunganira Will Smith mu mategeko bahakanye ibyo birego byose, bavuga ko ari ibinyoma bidafite ishingiro. Umwunganizi wa Smith yatangaje ko bazahangana n’iki kirego mu rukiko, bagaragaza ko umukiliya wabo ntacyo yishe amategeko.

Will Smith ubwe ntaratanga itangazo rirambuye ku giti cye, ariko itsinda rye ry’amategeko rivuga ko azaharanira ko izina rye riguma ritanduzwa n’ibirego rivuga ko bidafite gihamya

INGANZO HUB