Ishami rya gisirikare cya Palestinian Islamic Jihad, rizwi nka Al-Quds Brigades, ryatangaje ko ryaturikirije igisasu cyari cyaratezwe mbere gituritsa imodoka y’intambara ya Merkava y’ingabo za Israel mu gace ka Tuffah, mu burasirazuba bw’umujyi wa Gaza .
Mu itangazo bashyize ahagaragara, Al-Quds Brigades yavuze ko icyo gikorwa cyari kigamije guhagarika ibitero bya Israel, byakomeje gukaza umurego muri kariya gace. Bavuze ko imodoka y’igitare yari igiye gukomeza kwinjira mu gace k’imbere ka Tuffah, ariko ikagwa mu mutego watezwe mbere, igisasu gihita giturika irasandara.
Ku ruhande rwa Israel Defense Forces (IDF), nta tangazo rirambuye ryahise risohoka ryemera cyangwa ryamagana ibyo birego, ariko bivugwa ko urusaku rw’ibiturika rwumvikanye mu burasirazuba bw’umujyi wa Gaza ku manywa y’uyu wa Gatandatu.
Iki gikorwa kije mu gihe imvururu mu gace ka Gaza zikomeje gufata indi ntera, nyuma y’amezi menshi y’ubukana hagati ya Israel n’imitwe yitwaje intwaro ya Palestina. Kuva intambara yatangira mu Ukwakira 2023, Gaza yahuye n’ubushotoranyi bw’ikirenga, ndetse abaturage basaga ibihumbi 38 bamaze kwicwa, barimo n’abana benshi bishwe n’inzara no kudahabwa imfashanyo, nk’uko bivugwa n’imiryango mpuzamahanga.
Abasesenguzi b’intambara bagaragaza ko ibikorwa nk’ibi by’ubutasi no gutega ibisasu bigaragaza uburyo imitwe yitwaje intwaro irimo kwifashisha ibikoresho bifite ubushobozi bwo guhungabanya ibifaru n’indege bya Israel, nubwo hakiri icyuho gikomeye mu buryo bw’intwaro.
Al-Quds Brigades yavuze ko bizakomeza ibikorwa byabo mu rwego rwo guhangana n’icyo bita “ubugome bwa Israel n’ubugome bukorerwa abaturage b’abasivile”.
Nubwo Israel ikomeje kotsa igitutu imitwe yitwaje intwaro, hakomeje kwibazwa uko amaherezo y’iyi ntambara azamera, cyane cyane nyuma y’uko ibiganiro byo guhagarika intambara bikomeje kudindira, ndetse n’imfashanyo ikomeje guhura n’imbogamizi nyinshi ku mipaka.