Perezida wa Repubulika y’u Rwanda, Paul Kagame, yashimangiye ko urubyiruko ari inkingi y’ingenzi y’ejo hazaza h’igihugu, arusaba gushingira ku ndangagaciro nziza no ku mirimo ifite umumaro mu rwego rwo kwiyubaka no guteza imbere u Rwanda.
Ibi Umukuru w’Igihugu yabigarutseho ku wa 29 Ukuboza 2025, mu ijambo yagejeje ku rubyiruko rwari rwitabiriye ibirori byo gusoza umwaka.
Yibukije ko u Rwanda rufite umwihariko wo kuba abarenga 75% by’abaturage bari munsi y’imyaka 30, ibintu yavuze ko ari amahirwe akomeye ku gihugu.
Perezida Kagame yavuze ko uwo mubare munini w’urubyiruko ugize isoko ikomeye y’imbaraga z’igihugu, ariko agaragaza ko izo mbaraga zigomba gushingira ku ndangagaciro n’imirimo ifite ireme kugira ngo zigire umumaro urambye.
Yagize ati: “Mwe rubyiruko muri benshi mu bagize abaturage b’u Rwanda. Kuba 75% by’abaturage bari munsi y’imyaka 30 ni imbaraga zikomeye cyane. Tugomba kwemeza ko izo mbaraga zishingiye ku ndangagaciro zacu no ku mirimo ifite umumaro, ibafasha kwiyubaka no kubaka igihugu cyanyu.”
Umukuru w’Igihugu yongeye kwibutsa urubyiruko ko kubaka igihugu bidashoboka umuntu atabanje kwiyubaka, arusaba gufata inshingano zo kwiteza imbere binyuze mu guhanga udushya, gukora cyane no kugira imyitwarire iboneye.
Ati: “Ntushobora kubaka u Rwanda utabanje kwiyubaka. Ibyo ni byo mbasaba, kandi ni byo mbifuriza.”
Ubu butumwa Perezida Kagame yageneye urubyiruko, nk’uko bwatangajwe ku rubuga rwa X rw’Ibiro by’Umukuru w’Igihugu, bugaragaza ko u Rwanda rukomeje guha urubyiruko agaciro gakomeye nk’imbaraga nyamukuru z’iterambere rirambye n’ejo hazaza h’igihugu.