30 Kamena 2025
Src: Reuters | Umwanditsi: Corneille Ntaco
Moskova, 🇷🇺— Guverinoma ya Kremlin yatangaje ko yiteguye kuganira ku mahoro mu gihe Ukraine ndetse na Leta Zunze Ubumwe za Amerika “bakora ibikwiye” ngo intambara ihagarare.
Mu itangazo ridasanzwe ryasohowe kuri uyu wa mbere, abategetsi ba Rusiya bavuze ko iherezo ry’intambara “rishingiye ku bushake bwa Ukraine, ku ngufu Amerika izashyiramo, no ku rugero ibikorwa bya gisirikare bikomeza kugabanuka.”
Ariko ibyo Rusiya isaba ngo ibiganiro bibeho byatangaje benshi.
“Turi ku meza y’amahoro, ariko si twe tugomba gukora akazi kose,” ni ko byatangajwe n’umuvugizi wa Kremlin.
TRUMP N’AMAGAMBO YE Y’AMAYOBERA
Donald Trump Perezida wa Leta Zunze Ubumwe za Amerika, yari yaratangaje ko ashobora kurangiza iyi ntambara “mu munsi umwe gusa.” Hashize amezi atanu abivuze, ariko ubu noneho yavuze gusa ko “ikintu runaka kizaba.”
Abasesenguzi bavuga ko ibi bisobanuro biri mu kigereranyo cy’amagambo adafite ishingiro, kuko nubwo Trump akomeje kuvuga ko afite umuti wihuse, nta n’umwe uzi uwo muti.
RUSIYA ISABA UKRAINE KWEMERA IGIHOMBO GIKOMEYE
Nk’uko Reuters yabitangaje, Rusiya isaba Ukraine:
Kureka igice cy’ubutaka yigaruriye kikaba icy’uburusiya,
Kureka gukoresha intwaro zituruka mu Burengerazuba.
Ukraine, ku rundi ruhande, yahise isubiza ibyo bisabwa nk’ibitandukanye n’ukuri, ndetse bamwe mu bategetsi bayo bavuga ko ibyo Rusiya isaba bisa n’urwenya.
“Ushaka amahoro ariko ansaba kwiyahura? Ntibishoboka,” ni ko umwe mu bayobozi b’ingenzi i Kyiv yabitangaje.
INAMA EBYIRI NYUMA Y’IMYAKA ITATU
Nyuma y’imyaka itatu nta biganiro, impande zombi zahuye kabiri gusa na bwo mu kwezi gushize. Icyakora, aho kugira ngo baganire ku mahoro bahuriyeho, buri ruhande rwazanye igitekerezo cy’amahoro gitandukanye n’icy’undi ku buryo bisa nk’aho bavugaga indimi zitandukanye.
Uruhande rwa Ukraine rwari rufite inyandiko isaba Rusiya kuva mu butaka bwose yigaruriye, mu gihe Rusiya yasabaga ko ibyo bice byemezwa nk’ibyayo, ndetse Ukraine igahagarika ubufatanye n’ibihugu byo mu Burengerazuba.
ESE AMAHORO ARACYASHOBOKA?
Ibimenyetso by’amahoro biracyari kure, nubwo hari ubushake buke bugaragara ku mpande zombi. Aho guhuza, barushaho kugenda barushanya mu magambo no mu bisabwa.
Mu gihe isi yose ikomeje kugerwaho n’ingaruka z’iyi ntambara—ku isoko ry’ibiribwa, ingufu n’umutekano rusange—impaka zo ziracyakomeje.