Ambassadors of Christ Choir: Imyaka 30 y’ubutumwa, umuziki n’ingaruka nziza ku buzima bwa benshi

Hari amakorali make mu Rwanda yabashije kurenga imbibi z’insengero no kuba ikimenyabose ku rwego rw’igihugu ndetse no hanze yacyo. Mu mazina akunze kuvugwa cyane harimo Ambassadors of Christ Choir, korali y’Abadiventisiti b’Umunsi wa Karindwi imaze imyaka 30 ikora umurimo w’Imana binyuze mu muziki, ivugabutumwa n’ubuhamya bukora ku mitima ya benshi.

Yashinzwe mu mwaka wa 1995 mu Mujyi wa Kigali, Ambassadors of Christ Choir yabaye imwe mu nkingi zikomeye z’umuziki wa gikristo mu Rwanda no mu karere ka Afurika y’Iburasirazuba. Mu gihe imyaka yagiye ishira, iyi korali yagiye yubaka izina rikomeye rishingiye ku ndirimbo zifite ubutumwa bwimbitse, amajwi ahuza neza n’amashusho akorwa ku rwego rwo hejuru.

Uyu mwaka wa 2026 ni umwaka wihariye kuri iyi korali kuko irimo kwizihiza imyaka 30 imaze ikora umurimo w’Imana. Ni urugendo rwaranzwe n’ibigeragezo, intsinzi, ivugabutumwa ndetse no guhindura ubuzima bw’abatari bake binyuze mu butumwa bw’ibihangano byayo.

Igitaramo gikomeye cyo kwizihiza imyaka 30

Mu rwego rwo kwizihiza iyi sabukuru idasanzwe, Ambassadors of Christ Choir yateguye igitaramo gikomeye kizabera muri BK Arena ku wa 30 Kanama 2026. Iki gitaramo gitegerejwe na benshi bitewe n’amateka y’iyi korali n’uruhare yagize mu guteza imbere umuziki wa gikristo mu Rwanda no hanze yarwo.

Abakunzi bayo bategereje kuzongera kumva indirimbo zakunzwe mu bihe bitandukanye ndetse no kureba uburyo iyi korali yagiye ihinduka no gutera imbere muri iyo myaka yose ishize.

Umuziki urenga imbibi z’indimi n’ibihugu

Kimwe mu byatumye Ambassadors of Christ Choir igera kure ni ubushobozi bwo kugeza ubutumwa ku bantu b’ingeri zitandukanye. Indirimbo zabo ziririmbwa mu ndimi zirimo Ikinyarwanda, Icyongereza, Igiswahili ndetse n’Ikinyankore, ibintu byafashije ubutumwa bwazo kugera ku bantu benshi bo mu bihugu bitandukanye.

Uyu mwihariko watumye korali igira abakunzi mu Rwanda, Uganda, Tanzania, Kenya ndetse no mu bindi bice by’isi aho Abanyarwanda n’abakunzi b’umuziki wa gikristo batuye.

Abaririmbyi bubatse andi mateka yihariye muri korali

Mu myaka 30 ishize, Ambassadors of Christ Choir yagiye igira abaririmbyi benshi bafite impano zitangaje bagize uruhare rukomeye mu gutuma ikundwa n’abantu benshi.

Mu mazina akunze kuvugwa harimo Sarah Sanyu, umwe mu baririmbyi b’abagore bagiye bakundwa cyane n’abakunzi ba korali. Yamenyekanye kubera ijwi rye ry’umwihariko, uburyo bwo kuririmba bukora ku mutima ndetse n’ubushobozi bwo kugeza ubutumwa ku bo bugenewe mu buryo butuje ariko bwimbitse.

Abakunzi benshi ba Ambassadors of Christ bakunze kumushyira mu baririmbyi bagize uruhare rukomeye mu bihe bitandukanye byaranze amateka ya korali, cyane cyane mu ndirimbo zakunzwe cyane kandi zagize uruhare mu kwamamaza ibikorwa byayo.

Umusanzu wa Mwalimu Ssozi Joram

Iyo havuzwe amateka ya Ambassadors of Christ Choir, ntihabura kuvugwa uruhare rwa Mwalimu Ssozi Joram, umwe mu bantu bagize uruhare rukomeye mu kuyobora no guteza imbere ibikorwa bya korali.

Ubuhanga bwe mu gutunganya umuziki, kuyobora abaririmbyi no kubaka umwimerere w’ibihangano bya korali byafashije Ambassadors of Christ kugera ku rwego rwatumye iba imwe mu makorali yubashywe cyane muri Afurika y’Iburasirazuba.

Yabaye ikirango cy’umuziki wa gikristo mu Rwanda

Mu myaka myinshi ishize, Ambassadors of Christ Choir ntabwo yabaye korali ikorera gusa mu rusengero, ahubwo yahindutse ikirango cy’umuziki wa gikristo mu Rwanda.

Binyuze mu ndirimbo zifite ubutumwa bw’ibyiringiro, ukwizera, imbabazi, gukomera ku Mana no gutsinda ibigeragezo, iyi korali yagiye ikora ku buzima bw’abantu benshi b’ingeri zitandukanye.

Amashusho yayo akorwa mu buryo bwa kinyamwuga ndetse n’ubutumwa bwayo bwubakiye ku mahame ya Bibiliya byatumye ibikorwa byayo bikundwa n’abato n’abakuru.

Imbaraga ku mbuga nkoranyambaga

Muri iki gihe cy’ikoranabuhanga, Ambassadors of Christ Choir ni imwe mu makorali yo muri Afurika afite abayoboke benshi ku mbuga nkoranyambaga.

Shene yayo ya YouTube ifite abarenga miliyoni 1.6 biyandikishije (subscibers), ibintu bigaragaza uburyo ubutumwa bwayo bukomeje kugera ku bantu benshi ku migabane itandukanye y’isi.

Indirimbo nyinshi za korali zimaze kurebwa inshuro zisaga miliyoni, bigaragaza ko ubutumwa bwayo bukomeje gukundwa no kwakirwa neza.

Ambassadors of Christ Junior: Gutegura ejo hazaza

Mu rwego rwo gukomeza umurage wayo, korali yashinze korari y’abana izwi nka Ambassadors of Christ Junior.

Iki cyiciro cyagaragaje impano nyinshi z’abana binyuze mu ndirimbo zakunzwe cyane zirimo Nowa na Namani, zafashije abana benshi kwegera ubutumwa bwiza binyuze mu muziki.

Abasesenguzi b’umuziki wa gikristo bavuga ko iki gikorwa ari imwe mu ngamba zikomeye zo gutegura abazakomereza ku murage wa Ambassadors of Christ mu bihe biri imbere.

Gukomera hagati y’ibigeragezo

Mu mateka yayo, iyi korali yahuye n’ibihe bikomeye. Muri Gicurasi 2011, yahuye n’impanuka ikomeye y’imodoka ubwo yari ivuye mu bikorwa by’ivugabutumwa muri Tanzania, ihitana bamwe mu bari bagize iyi korari.

Nubwo icyo gihe cyabaye icy’ishavu n’agahinda ku miryango yabo no ku bakunzi ba korali, ibikorwa byayo ntibyahagaze. Ahubwo byabaye ikimenyetso cy’ukwizera no gukomera mu rugendo rw’umurimo w’Imana nk’uko na bo ubwabo mu ndirimbo yabo “Birakwiye Gushima” babihamije mu gitero cyayo cya kabiri kigira kiti:

Ambassadors of Christ turashima, nyamara kuri bamwe ntibyumvikana, ukurikije ibyago twagize uvuze gushima ntibyumvikana neza.

Ariko nshuti, utuje neza, ukibaza iby’iriya mpanuka, byarashobokaga ko twese tugenda ntihabe n’umwe uvuga aya mateka.

Iyo ndirimbo yose wayumva ku muyoboro wabo wa YouTube ukanze aha https://youtu.be/edj8ZTNlK60?si=ePHZoI_PeF-G-BaG

Ubutumwa bukomeje kugera kure

Nyuma y’imyaka 30, Ambassadors of Christ Choir ikomeje kuba kimwe mu bigo by’ivugabutumwa bikomeye bikoresha umuziki mu Rwanda no muri Afurika y’Iburasirazuba.

Mu gihe imyiteguro y’igitaramo cyo kwizihiza iyi sabukuru ikomeje, abakunzi bayo bakomeje kwitegura guhurira muri BK Arena ku wa 30 Kanama 2026 kugira ngo bifatanye n’iyi korali mu kwizihiza urugendo rw’imyaka 30 rwuzuyemo indirimbo, ukwizera, ivugabutumwa n’ibyiringiro.

Kuri benshi, Ambassadors of Christ Choir si korali gusa; ni ishuri ry’umuziki wa gikristo, ni urubuga rw’ivugabutumwa, kandi ni umurage ukomeje kwandikwa mu mateka y’u Rwanda no hanze yarwo.

Ba uwa mbere ku makuru yacu https://whatsapp.com/channel/0029Vad5UfC89inh67apBK2j