Vestine na Dorcas batangaje gutandukana na MIE nyuma y’urugendo rw’imyaka isaga itanu

Itsinda ry’abahanzi baririmba indirimbo zo kuramya no guhimbaza Imana rigizwe na Vestine na Dorcas ryatangaje ku mugaragaro ko rihagaritse ubufatanye ryari rifitanye na MIE (Murindahabi Irene Entertainment), ikigo cyari kimaze imyaka irenga itanu kibacunga ndetse kibafasha mu rugendo rwabo rwa muzika.

Mu itangazo ryashyizwe ahagaragara ku mbuga nkoranyambaga z’aba bahanzi, Vestine na Dorcas bavuze ko iki cyemezo cyafashwe nyuma yo kubitekerezaho no kubisesengura igihe kirekire.

Bagize bati: “Nyuma yo kubitekerezaho no kubisesengura neza, twe Vestine na Dorcas twafashe icyemezo cyo guhagarika ku mugaragaro ubufatanye twari dufitanye na MIE, guhera ubu.”

Nubwo bahisemo gutandukana n’iki kigo, aba bahanzi bashimangiye ko bagifitiye icyubahiro n’ishimwe byinshi kubera uruhare rukomeye cyagize mu iterambere ryabo.

Bavuze ko MIE yababereye umugisha kuva ku ntangiriro z’urugendo rwabo, ikabizera igihe bari bagitangira, ikabashoramo imari ndetse ikanabayobora mu bihe by’ingenzi by’ubuzima bwabo bwa muzika.

Mu magambo yabo, bagaragaje ko Murindahabi Irene n’ikipe ya MIE batagize uruhare rw’abacuruzi gusa, ahubwo babaye nk’ababyeyi babafashije gukura no kuba abo bari bo uyu munsi.

Bagize bati: “MIE yagize uruhare nk’urw’ababyeyi mu rugendo rwacu, idutoza, iturinda kandi idufasha kuba abahanzi n’abantu turi bo uyu munsi. Tuzahora tuyishimira urukundo, ubufasha n’amahirwe yaduhaye.”

Urugendo rwatangiranye na Murindahabi Irene

Vestine na Dorcas batangiye kumenyekana cyane mu muziki wa Gospel nyuma yo kwinjira mu maboko ya Murindahabi Irene binyuze muri MIE.

Mbere yo kugera muri MIE, aba bakobwa bari basanzwe bafite impano yo kuririmba, ariko ni nyuma yo guhura na Murindahabi Irene ubwo ibikorwa byabo byatangiye kugera ku rwego rwo hejuru.

MIE yabafashije gutunganya umuziki wabo mu buryo bwa kinyamwuga, ibashakira amajwi meza, amashusho agezweho ndetse inabafasha kwamamaza ibikorwa byabo ku rwego rwagutse.

Muri uru rugendo, Vestine na Dorcas basohoye indirimbo zakunzwe cyane zirimo izatumye bamenyekana imbere no hanze y’u Rwanda. Bagiye bagaragara mu bitaramo bitandukanye, bakomeza kubaka izina rikomeye muri muzika yo kuramya no guhimbaza Imana.

Abakurikiranira hafi imyidagaduro bavuga ko ubufatanye bwa Vestine na Dorcas na Murindahabi Irene ari bumwe mu bwatanze umusaruro ugaragara mu muziki wa Gospel mu myaka yashize, kuko bwafashije aba bahanzi kugera ku rwego rwo kuba bamwe mu bafite igikundiro kinini mu Rwanda.

Kuki bahisemo gutandukana?

Mu itangazo ryabo, Vestine na Dorcas ntibatangaje impamvu zihariye zateye itandukana ryabo na MIE.

Icyakora, bavuze ko bageze igihe bumva bagomba gukomeza urugendo rwabo mu bwigenge kugira ngo bashobore gushyira mu bikorwa icyerekezo, indangagaciro n’ahazaza bifuza kubaka.

Bagize bati: “Twishimira ibyo twagezeho twese hamwe ndetse n’ibihe byiza twasangiye. Ariko muri iki gihe twumva ari ngombwa gukomeza urugendo rwacu twigenga, mu buryo bujyanye n’icyerekezo cyacu, indangagaciro zacu n’ahazaza twifuza kubaka.”

Aya magambo yatumye benshi batangira kwibaza niba aba bahanzi bagiye gutangira ikindi cyiciro gishya cya muzika yabo, bishoboka ko bazajya bicungira ibikorwa byabo cyangwa se bagashinga indi gahunda nshya yo kubateza imbere.

Ubutumwa ku bafana

Vestine na Dorcas bashimiye abafana babo bababaye hafi kuva batangira urugendo rwabo rwa muzika.

Bavuze ko urukundo n’icyizere bakomeje kugirirwa n’ababakurikira ari byo byabafashije gukomeza gutera imbere.

Mu butumwa bwabo, basabye abakunzi babo kutabona iri tandukana nk’iherezo ry’urugendo, ahubwo nk’intangiriro y’indi ntambwe nshya.

Bagize bati: “Ibi si iherezo, ahubwo ni intangiriro y’igice gishya. Dushimishijwe n’ibiri imbere kandi ntidushobora gutegereza kubisangiza.”

Nubwo ubufatanye bwa Vestine na Dorcas na MIE burangiye, amagambo yabo agaragaza ko impande zombi zitandukanye mu bwubahane kandi nta makimbirane agaragara yashyizwe ku mugaragaro.

Aba bahanzi batangaje ko bakomeje urugendo rwabo rwa muzika, mu gihe MIE na yo bayifurije gukomeza gutsinda mu bikorwa byayo byose biri imbere.

Ku bakunzi b’umuziki wa Gospel, amaso yose ubu ahanzwe ku ntambwe nshya Vestine na Dorcas bagiye gutera nyuma yo gufunga igice cy’urugendo rwabo rwanditsweho byinshi hamwe na Murindahabi Irene, umugabo wagize uruhare rukomeye mu kubageza ku rwego bariho uyu munsi. Injira muri WhatsApp Channel yacu ukanze aha https://whatsapp.com/channel/0029Vad5UfC89inh67apBK2j