Imikino ine ikomeye iragena icyerekezo cy’amatsinda C na D mu irushanwa ry’Igikombe cy’Isi 2026

Mu gihe irushanwa ry’Igikombe cy’Isi cya 2026 rikomeje gufata indi ntera, uyu wa Gatanu tariki ya 19 Kamena 2026 harakinwa imikino ine ishobora guhindura isura y’amatsinda C na D, aho amakipe akomeye nka Brazil na Leta Zunze Ubumwe za Amerika (USA) ashaka gutsindira amanota atatu y’ingenzi, mu gihe Maroc, Scotland, Türkiye na Paraguay na byo bihatanira gukomeza kwiyegereza icyiciro gikurikira.

Umukino utegerejwe cyane ni urahuza USA na Australia. Aya makipe yombi yatangiye neza irushanwa atsinda imikino yayo ya mbere, bivuze ko intsinzi kuri buri ruhande yayashyira mu mwanya mwiza wo kuyobora itsinda D no kwegera itike yo gukomeza. USA ifite icyizere ishingiye ku busatirizi bwayo bugaragaza imbaraga, mu gihe Australia izwiho gukina yugarira neza no kugaba ibitero byihuse.

Mu itsinda C, Scotland irakina na Maroc mu mukino ushobora gusobanura byinshi ku rugendo rw’aya makipe. Scotland yinjiye muri iri rushanwa ifite icyizere nyuma yo gutsinda umukino ubanza, ariko igiye guhura na Maroc yagaragaje urwego rwo hejuru ubwo yanganyaga na Brazil. Maroc isa n’ifite amahirwe menshi bitewe n’uburyo ihuza ubwirinzi bukomeye no gusohoka neza mu busatirizi.

Naho Brazil iramanuka mu kibuga ihura na Haiti ifite igitutu cyo kubona intsinzi ya mbere. Gutsindwa cyangwa kunganya byakongera gushyira mu kaga imwe mu makipe akunzwe cyane muri iri rushanwa. Nyuma yo kunganya na Maroc, abakinnyi nka Vinícius Júnior basabwa kwitwara neza kurushaho kugira ngo bereke isi impamvu Brazil ikomeje kubarwa mu bahatanira igikombe. Haiti na yo irinjira mu kibuga izi neza ko n’inota rimwe ryayifasha gukomeza kugira icyizere cyo kurenga amatsinda.

Undi mukino ukomeye urahuza Türkiye na Paraguay mu itsinda D. Aya makipe yombi akeneye intsinzi kugira ngo adatakaza amahirwe yo gukomeza, bityo bikaba bitegerejwe ko haraba umukino urimo guhatana gukomeye kuva ku munota wa mbere kugeza ku wa nyuma.

Uyu munsi ushobora kuba umwe mu minsi itangira gutandukanya amakipe azahatanira igikombe n’azatangira gutekereza ku gutaha. Brazil ifite byinshi byo kwerekana nyuma y’uko itatanze umusaruro wari witezwe, mu gihe Maroc ifite amahirwe yo kwemeza ko kunganya na Brazil bitari impanuka. USA na yo ifite amahirwe yo kwiyubakira umwanya mwiza mu itsinda D, ariko Australia ni ikipe itajya ipfa kwemera gutsindwa byoroshye.

Ku bakunzi b’umupira w’amaguru, imikino y’uyu munsi ni imwe mu ishobora gutanga umusaruro mwiza, kubera ko buri kipe izi neza ko amanota atatu ashobora kuyegereza cyane icyiciro cy’irangiza, mu Gikombe cy’Isi cya mbere cyitabiriwe n’amakipe 48. Dukurikire no kuri WhatsApp Channel ujye ubona amakuru byihuse https://whatsapp.com/channel/0029Vad5UfC89inh67apBK2j