HUYE: ‘MTN Iwacu Muzika Festival 2026’ yatangiriye mu byishimo, ihuriza hamwe ibihumbi by’abakunzi b’umuziki

Ibihumbi by’abakunzi b’umuziki baturutse mu Karere ka Huye no mu turere duhana imbibi na ko, birimo Nyanza, Gisagara na Nyamagabe, byitabiriye igitaramo cya mbere cya MTN Iwacu Muzika Festival 2026, cyabereye ku kibuga cya Kaminuza y’u Rwanda, Ishami rya Huye.

Iri serukiramuco ritegurwa na East African Promoters (EAP) ku bufatanye na MTN Rwanda, Primus na BPR Bank Rwanda Plc, ryatangiye ku nshuro yaryo ya karindwi rifite umwihariko wo kongera guhuriza hamwe abahanzi batandukanye bamaze kubaka izina rikomeye mu muziki nyarwanda.

Uyu mwaka, abahanzi umunani ari bo Amalon, Ross Kana, Kivumbi King, Marina, Kenny Sol, Bushali, Davis D na Chriss Eazy ni bo bazazenguruka igihugu basusurutsa abakunzi babo mu mijyi irindwi irimo Huye, Ngoma, Nyagatare, Muhanga, Musanze, Rubavu na Karongi.

By’umwihariko, iri serukiramuco ryahaye umwanya Nemeye Platini wamamaye nka Platini P, wegukanye Primus Guma Guma Super Star ari mu itsinda rya Dream Boyz mu 2017, kugira ngo yifatanye n’abakunzi b’umuziki bo mu mujyi watangiriyemo urugendo rwe rwa muzika.

Igitaramo cyatangiye saa cyenda n’iminota 22 z’amanywa, kirangira saa tatu n’igice z’ijoro, kirangwa n’imbaraga, ibyishimo n’ubwitabire budasanzwe bw’urubyiruko.

Amalon ni we wabimburiye abandi bahanzi ku rubyiniro, asusurutsa imbaga y’abari bitabiriye igitaramo binyuze mu ndirimbo zirimo “Derila”, “Nyirabasare” na “Byakubaho”.

Ross Kana na we yagaragaje ko ari umwe mu bahanzi bagezweho, aho abakunzi be bari bitwaje ibyapa byanditseho amagambo amugaragariza urukundo. Indirimbo ze zirimo “Sesa”, “Mami” na “Molela” zakiranywe ubwuzu bwinshi.

Kivumbi King, Marina na Kenny Sol bakurikiyeho, buri umwe agaragaza ubuhanga bwe bwo gutaramira imbaga. Marina yanatunguranye ubwo yasubikaga igitaramo iminota mike kubera ikibazo cy’imyambaro ye mbere yo gusubira ku rubyiniro.

Umuraperi Bushali na we yatanze ibyishimo bidasanzwe, aho yaserukanye imyambarire idasanzwe yibukije benshi imiterere ya filime za “Spiderman”, anasoza aha abakunzi be impano zirimo imipira ya MTN.

Davis D, wiyita “Umwami w’Amajyepfo”, yerekanye ubuhanga bwe mu kuririmba no kwegera abafana, aho yanaririmbiye hagati yabo mbere yo gutumira Platini P ku rubyiniro bagafatanya kuririmba indirimbo “Jeje”.

Mu gusoza igitaramo, Chriss Eazy yanyuze benshi mu ndirimbo zirimo “Edeni”, “Basi Sori”, “Sekoma”, “My Mind”, “Bana” na “Jugumila”, yasorejeho asiga ibyishimo byinshi mu bitabiriye iki gitaramo.

Mu butumwa yatanze, Umuyobozi w’Akarere ka Huye, Sebutege Ange, yashimye gahunda zifasha abaturage kubona uburyo bwo kwidagadura, anashishikariza urubyiruko gukoresha impano zarwo nk’inzira yo kwiteza imbere no kwirinda ingeso mbi zirimo ubusinzi n’ibiyobyabwenge.

MTN Iwacu Muzika Festival 2026 yatangiriye i Huye igaragaza ko izaba imwe mu bikorwa bikomeye by’imyidagaduro bizahuriza hamwe Abanyarwanda mu mpande zitandukanye z’igihugu, binyuze mu muziki, ubusabane no guteza imbere impano z’abahanzi nyarwanda. Ba uwa mbere ku makuru yacu. httpshttps://whatsapp.com/channel/0029Vad5UfC89inh67apBK2j